បាតុករប្រឆាំងនឹងគំរោងច្បាប់អាពាហ៍ពិពាហ៍ភេទដូចគ្នា នៅក្រុងប៉ារីស កាលពីថ្ងៃទី២១ មេសា
តាមការគ្រោងទុក នៅថ្ងៃអង្គារនេះ គម្រោងច្បាប់ដែលមានឈ្មោះជាផ្លូវការថា “អាពាហ៍ពិពាហ៍សំរាប់ទាំង អស់គ្នា” ដែលរាប់បញ្ចូលទាំងអាពាហ៍ពិពាហ៍រវាងអ្នកស្រឡាញ់ភេទដូចគ្នាផងនោះ នឹងត្រូវបានលើកឡើងក្នុងរដ្ឋសភាដើម្បីឲ្យអ្នកតំណាងរាស្រ្ត បោះឆ្នោតអនុម័តនៅរវាងម៉ោង១៥ ក្នុងស្រុក។
ទោះជាមានបញ្ហាដ៏ចម្រូងចម្រាសនេះក៍ដោយ ក៏គម្រោងច្បាប់នេះត្រូវបានគេមើលឃើញថាទំនងជានឹងត្រូវបានរដ្ឋ សភាបារាំងបោះឆ្នោតអនុម័ត ដោយយោងទៅលើ ការពិភាក្សាម្តងរួចមកហើយ កាលពីខែកុម្ភៈនៅរដ្ឋសភា ដែលកាលនោះអ្នកតំណាងរាស្រ្តបានបោះឆ្នោតគាំទ្រចំនួន៣២៩សម្លេង ទល់នឹង២២៩ប្រឆាំង។
អ្នកតំណាងរាស្រ្តមួយចំនួនមកពីខាងគណបក្សស្តាំនិយមហៅកាត់ថា UMP បានប្រកាសថាប្រសិនបើគណបក្សរបស់ខ្លួនត្រលប់មកគ្រប់គ្រង រដ្ឋាភិបាលវិញនោះ ខ្លួនប្រាកដជានឹងលុបចោលនូវច្បាប់នេះជាក់ជាមិនខាន។
នៅក្រៅរដ្ឋសភាវិញ ក្រុមអ្នកគាំទ្រនិងអ្នកប្រឆាំងនឹងអាពាហ៍ពិពាហ៍នេះ បាននាំគ្នាធ្វើបាតុកម្មតាមផ្លូវថ្នល់ដើម្បីបញ្ចេញមតិរៀងៗខ្លួន តាំងពីថ្ងៃអាទិត្យ ដែលបានបង្កឲ្យមានការប៉ះទង្គិចគ្នារវាង ក្រុមទាំងពីរ។ រហូតមកដល់ថ្ងៃអង្គារនេះដែរ គេក៏នៅសង្កេតឃើញមានការធ្វើបាតុកម្មជាហូរហែផងដែរនៅតាមបណ្តា ទីក្រុងនានានៃប្រទេសបារាំង។
វត្តមានកំលាំងនគរបាលត្រូវបានពង្រឹងនៅតាមសង្កាត់ជាច្រើនដែលមាន វត្តមានសហគមន៍នៃអ្នកស្រឡាញ់ភេទដូចគ្នាក្នុងរដ្ឋធានីប៉ារីស បន្ទាប់ពីការកើតមានអំពើហិង្សាមួយចំនួនដែលសង្ស័យទាក់ទងទៅនឹង ការខ្វែងគំនិតគ្នាក្នុងបញ្ហានេះ។
លើសពីនេះទៅទៀត ប្រធានរដ្ឋសភាបារាំងគឺ លោក ក្លូដ បារតូឡូន (Claude Bartolone)បានទទួលលិខិតអនាមិកមួយដែលក្នុងនោះមានផ្ទុកនូវរំសេវ និងសំបុត្រគំរាមកំហែងមួយច្បាប់ដើម្បីស្នើឲ្យពន្យារពេលបោះឆ្នោត លើពង្រាងច្បាប់អាពាហ៍ពិពាហ៍រវាងអ្នកមានភេទដូចគ្នានេះ។
ប្រសិនបើគម្រោងច្បាប់នេះត្រូវបានអនុម័តមែននោះ ច្បាប់នេះនឹងត្រូវប្រកាសឲ្យប្រើជាផ្លូវការដោយលោកប្រធានាធិបតី បារាំង បន្ទាប់ពីការសំរេចចិត្តរបស់ក្រុមប្រឹក្សាធម្មនុញ្ញ។ ការចូលជាធរមាននៃច្បាប់នេះ នឹងត្រូវបានចាត់ទុកជាជោគជ័យរបស់លោកប្រមុខរដ្ឋបារាំងរូបនេះដែល បានសន្យានៅក្នុងយុទ្ធនាការឃោសនាបោះឆ្នោត កាលពីឆ្នាំ២០១២ ពិសេសខណៈដែលប្រជាប្រិយភាពរបស់លោកកំពុងធា្លក់ចុះយ៉ាង ខ្លាំងនៅពេលនេះ។
ម៉្យាងវិញទៀត ប្រទេសបារាំងនឹងក្លាយជាប្រទេសទី១៤ដែលអនុញ្ញាតឲ្យមានការរៀប អាពាហ៍ពិពាហ៍អ្នកស្រឡាញ់ភេទដូចគ្នា បន្ទាប់ពីបណ្តាប្រទេសផ្សេងៗទៀតលើពិភពលោករួមមានប្រទេសហូឡង់ ប៊ែលហ្ស៊ិក អេស្បាញ ស៊ុយអ៊ែដ អាហ្រ្វិកខាងត្បូង និងនៅតាមបណ្តារដ្ឋមួយចំនួនរបស់សហរដ្ឋអាមេរិក។ប្រភពពី (RFI)
