ស្ត្រី ជនជាតិអង់គ្លេសម្នាក់បានបង្ខំកូនស្រីចិញ្ចឹមរបស់ខ្លួនឲ្យ ពពោះតាមរយៈការចាក់បញ្ចូលមេជីវិតដើម្បីបង្កកំណើតឲ្យ ក្រោយពីស្ត្រីម្នាក់នោះ ត្រូវគេហាមឃាត់មិនឲ្យសុំកូនមកចិញ្ចឹមបន្តទៀតបាន។
គេ ជឿថា កូនស្រីដែលនៅក្រមុំព្រហ្មចារីម្នាក់នោះបានរលូតកូនតាំងពី អាយុ១៤ឆ្នាំ ប៉ុន្តែនៅតែបន្តមានកូននៅអាយុ១៦ឆ្នាំ តាមរយៈការចាក់មេជីវិត (Sperm) ដែលម្ដាយចិញ្ចឹមរបស់នាង បានទិញតាមប្រព័ន្ធអ៊ីនធឺណិត។
ម្ដាយចិញ្ចឹមដែលធ្វើសកម្មភាពមិនគួរគប្បីខាងលើ បច្ចុប្បន្នត្រូវតុលាការកាត់ទោសឲ្យជាប់ពន្ធនាគាររយៈពេល ៥ឆ្នាំ បន្ទាប់ពីបានសារភាពពីទង្វើព្រៃផ្សៃចំពោះក្មេងស្រីរងគ្រោះ។
នេះគ្រាន់ជារូបតំណាងប៉ុណ្ណោះ
ស្ត្រី ជាប់ចោទ បានសុំកូនយកមកចិញ្ចឹមចំនួន៣នាក់ហើយពីប្រទេសដទៃ (ពីរនាក់នៅពេលដែលគាត់បានរៀបការរួច និងម្នាក់ទៀតក្រោយលែងលះគ្នាជាមួយប្ដី)។ ស្រីជាប់ចោទ បានសម្រេចចិត្តមិនបង្កើតកូនដោយខ្លួនឯងទេ ព្រោះតែបញ្ហាសុខភាព និងមានជំងឺមិនអាចមានកូនបាន។
ស្រីរងគ្រោះដែលជាកូនចិញ្ចឹម បានចាប់ផ្ដើមមានផ្ទៃពោះតាមសំណើរបស់ម្ដាយចិញ្ចឹម ដោយបានចាក់បញ្ចូលមេជីវិត ក្នុងគោលបំណងបង្កើតកូនទី៤ឲ្យស្រីជាប់ចោទ។
តាមសម្ដីចៅក្រមបានឲ្យដឹងថា ការបង្កកំណើតលក្ខណៈសិប្បនិម្មិតនេះ ត្រៀមធ្វើនៅពេលដែលក្មេងស្រីរូបនោះមានអាយុ ១៣ឆ្នាំ និងចាប់ផ្ដើមធ្វើពេលដែលនាងអាយុ១៤ឆ្នាំ និងបញ្ចប់នៅពេលដែលនាងមានផ្ទៃពោះនៅអាយុ១៦ឆ្នាំ។
រឿងអាស្រូវនេះ បានផ្ទុះឡើងនៅពេលដែលក្មេងស្រីរងគ្រោះបានឆ្លងទន្លេ។ មុននោះ គេសង្កេតឃើញក្មេងស្រី ហាក់មានការស្ទាក់ស្ទើរក្នុងការប្រគល់ទារកនោះទៅឲ្យម្ដាយចិញ្ចឹម របស់នាង។ ម្ដាយចិញ្ចឹមរូបនោះបាននិយាយថា គាត់ធ្វើបែបនេះដោយសារគាត់ជាមនុស្សដែលស្រលាញ់ក្មេង ហើយក៏គ្មានវិធីណាល្អជាងវិធីមួយនេះដែរ។
ក្នុង រយៈពេលត្រឹមតែ២ឆ្នាំ ក្មេងស្រីរងគ្រោះត្រូវចាក់បញ្ចូលមេជីវិតដែលម្ដាយចិញ្ចឹម របស់នាងបានរៀបចំឲ្យតាមសឺរ៉ាំងចាក់ថ្នាំដល់ចំនួន៧ដង។
ទោះ បីមានការភ័យខ្លាច និងមិនពេញចិត្តចំពោះការបង្ខំរបស់ម្ដាយ ក្មេងស្រីរងគ្រោះបានរៀបរាប់ថា នាងធ្វើបែបនេះដោយសារនាងស្រលាញ់ម្ដាយចិញ្ចឹមរបស់នាង ហើយនាងគ្មានភាពក្លាហានក្នុងការប្រកែកជាមួយម្ដាយរបស់នាងឡើយ។
ទោះជាយ៉ាងណា ប្រភពមិនបញ្ជាក់ពីអត្តសញ្ញាណស្ត្រីជាម្ដាយខាងលើនោះទេ៕
ប្រែសម្រួល៖ សរ សុគន្ធី
ប្រភព៖សប្បាយ
ប្រភព៖សប្បាយ
