ភ្នំពេញ ៖ ជនសង្ស័យពីរនាក់ត្រូវប្រជាពលរដ្ឋចាប់ឃាត់ខ្លួនប្រគល់ឲ្យ សមត្ថកិច្ច បន្ទាប់ពីពួកគេធ្វើសកម្មភាពឆក់ទូរស័ព្ទដៃនារីរងគ្រោះបានសំរេច ហើយជិះទៅបុក រថយន្តមួយគ្រឿងបណ្ដាលឲ្យដួលទាំងជនរងគ្រោះនិងជនសង្ស័យ។
ហេតុការណ៍នេះកើតមានឡើងនៅចំណុចមុខផ្ទះលេខ២១B ផ្លូវ ១៥៥ ក្រុមទី២១ ភូមិ៣ សង្កាត់ផ្សារដើមថ្កូវ ខណ្ឌចំការមន កាលពីវេលាម៉ោង ១៩និង៣០នាទីយប់ ថ្ងៃទី២៣ ខែមេសា ឆ្នាំ២០១៣។ នារីរងគ្រោះ មិនទាន់ត្រូវបានស្គាល់អត្តសញ្ញាណទេ ដោយសារក្រុមគ្រួសារនិងសមត្ថកិច្ចដឹកយកទៅសង្គ្រោះនៅមន្ទីរពេទ្យ មិត្តភាពខ្មែរសូវៀតភ្លាមៗ។
សាក្សីបានឲ្យដឹងថាមុនពេលកើតហេតុគេឃើញនារីរងគ្រោះ ជិះម៉ាកឃ្លីក ពណ៌ខ្មៅ ពាក់ស្លាកលេខភ្នំពេញ 1M-2794តែម្នាក់ឯង ក្នុងទិសដៅពីជើងទៅត្បូងតាមបណ្តោយផ្លូវលេខ១៥៥លុះដល់ចំណុច កើតហេតុនារីរងគ្រោះបានដកទូរសព្វ័ដៃម៉ាកអាយហ្វូនហ្វ័រ(Iphone4) និយាយ ខណៈនោះក៏ស្រាប់តែមានជនសង្ស័យពីរនាក់ជិះម៉ូតូឃ្លីក ពណ៌សលាយក្រហម ពាក់ស្លាកលេខព្រៃវែង 1B-0558 ធ្វើ សកម្មភាពឆក់ទូរស័ព្ទដៃនោះ ពីនារីរងគ្រោះបានសំរេចតែភ្លាមនោះនារីរងគ្រោះចិត្តសឿងដែរក៏បាន បើកម៉ូតូដេញតាមពួកចោរពីក្រោយធ្វើឲ្យជនសង្ស័យភ័យបើកលឿនជ្រុលទៅ បុករថយន្តមួយគ្រឿងម៉ាក KEA morning ពាក់ស្លាកលេខបណ្ដោះអាសន្ន 3743 ដែល ជិះបញ្ច្រាសទិសគ្នា បណ្តាលឲ្យម៉ូតូទាំងពីរគ្រឿងដួល ហើយនារីរងគ្រោះរងរបួសធ្ងន់ ចំណែកចោរទាំងពីរនាក់ ត្រូវបានប្រជាពលរដ្ឋព្រួតវាយទ្រមខ្លួន ចាប់ប្រគល់ឲ្យសមត្ថកិច្ចនគរបាលប៉ុស្តិ៍ផ្សារដើមថ្កូវដោះស្រាយ តាមច្បាប់។ នារីរងគ្រោះបានរងរបួសធ្ងន់បាក់ភ្លៅត្រូវបានគេបញ្ជូនទៅធ្វើ ការសង្គ្រោះនៅមន្ទីរពេទ្យ មិត្តភាពខ្មែរសូវៀតភ្លាមៗ។
ជនសង្ស័យទាំងពីរនាក់ដែលសមត្ថកិច្ចឃាត់ខ្លួនទី១. ឈ្មោះ សុខ ចំរើន អាយុ១៨ឆ្នាំ មុខរបរកម្មកររោងចក្រ ស្នាក់នៅផ្ទះជួល ស្ថិតនៅសង្កាត់ដង្កោ ខណ្ឌដង្កោ និងម្នាក់ទៀតឈ្មោះ ទិត្យ ណារ៉ា អាយុ១៩ឆ្នាំ ជាជានិស្សិតសាកលវិទ្យាល័យអាស៊ីអឺរ៉ុប ស្នាក់នៅជាមួយគ្នា។
បច្ចុប្បន្ន ជនសង្ស័យកំពុងត្រូវបានសមត្ថកិច្ចឃាត់ខ្លួនសាកសួរនិងកសាងសំណុំរឿង បញ្ជូនទៅតុលាការដើម្បីមានវិធានការទៅតាមផ្លូវច្បាប់៕ប្រភពពី កម្ពុជាថ្មី
ឌួងវិរៈជ័យ
