មន្ត្រីជាន់ខ្ពស់របស់ថៃ ជំរុញឲ្យប្រជាជនខ្លួន រស់នៅតាមព្រំដែនកម្ពុជា-ថៃ រក្សាភាពស្ងៀមស្ងាត់ គោរពការសម្រេចរបស់តុលាការអន្តរជាតិ(ICJ) ដើម្បីកេរ្តិ៍ឈ្មោះល្អរបស់ប្រទេសថៃ លើឆាកអន្តរជាតិ។
រដ្ឋមន្ត្រីក្រសួងអប់រំថៃ លោក Pongthep Thepkanchana លើកឡើងបែបនេះ ស្របពេលលោកនាយករដ្ឋមន្ត្រី ហ៊ុន សែន កាលពីថ្ងៃព្រហស្បតិ៍ ម្សិលមិញនេះ បានអំពាវនាវឲ្យប្រជាពលរដ្ឋកម្ពុជា រក្សាភាពស្ងប់ស្ងាត់ ទាក់ទងនឹងជម្លោះប្រាសាទព្រះវិហារ នៅពេលដែលកម្ពុជា និងថៃ ប្រឈមមុខគ្នា ក្នុងសវនាការតុលាការយុត្តិធម៌អន្តរជាតិក្រុងឡាអេ។
លោក Pongthep Thepkanchana មានប្រសាសន៍ក្នុងកិច្ចសម្ភាសន៍ជាមួយកាសែតបាងកកប៉ុស្តិ៍ថា ថ្នាក់ដឹកនាំថៃ ជំរុញឲ្យប្រជាជនខ្លួនគោរពច្បាប់ និងចៀសវាងការបង្កើតនូវស្ថានការណ៍នានា ដែលអាចបង្ហាញថា ថៃមិនគោរពដំណើរការអង្គច្បាប់ ជាហេតុនាំឲ្យមានភាពមិនល្អដល់ប្រទេសខ្លួន។ លោកបញ្ជាក់ថា ៖«យើងគួរតែជួយបង្កើតនូវបរិយាកាសមួយ ដែលបង្ហាញថា ប្រជាជនថៃគោរពច្បាប់ យើងធ្វើអ្វីដែលត្រឹមត្រូវ យើងមិនឈ្លានពានទឹកដីប្រទេសដទៃ»។
លោក Pongthep Thepkanchana ក៏បានអំពាវនាវឲ្យប្រជាជនខ្លួនតាមដានសវនាការតាមប្រព័ន្ធ ផ្សព្វផ្សាយក្នុងស្រុក ដូច្នេះនឹងដឹងថាតើគណៈប្រតិភូមថៃ នឹងធ្វើអ្វីឲ្យអស់ពីសមត្ថភាព។ លោកបន្តថា ប្រទេសថៃ បានរៀបចំអ្វីៗ រួចរាល់ហើយ ដោយមានអ្នកជំនាញច្បាប់ ដែលមានបទពិសោធន៍ និងទទួលស្គាល់លើពិភពលោក។
គណៈប្រតិភូថៃ នឹងចាកចេញពីប្រទេសថៃ ទៅកាន់តុលាការអន្តរជាតិទីក្រុងឡាអេ(ICJ) នៅថ្ងៃសៅរ៍ស្អែកនេះ ដើម្បីចូលរួមសវនាការ បកស្រាយរឿងក្តីប្រាសាទព្រះវិហារ ដែលមានកម្ពុជា ជាដើមបណ្តឹង។ មន្ត្រីទាំងនោះ រួមមាន រដ្ឋមន្ត្រីការបរទេសថៃ រដ្ឋមន្ត្រីការពារជាតិថៃ លេខារងអចិន្ត្រៃយ៍របស់ក្រសួងការពារជាតិ ប្រធាននាយកដ្ឋានកិច្ចការព្រំដែន និងរដ្ឋមន្ត្រីក្រសួងអប់រំ។ប្រទេសថៃ នឹងផ្សាយផ្ទាល់សវនាការICJ ជាភាសាបារាំង អង់គ្លេស និងភាសាថៃ នៅលើគេហទំព័រ www.phraviharn.org លើទូរទស្សន៍NBTប៉ុស្តិ៍លេខ១១ និងស្ថានីយ៍វិទ្យុចំនួន៣ សម្រាប់ប្រជាជនខ្លួន។
កាលពីល្ងាច ថ្ងៃអង្គារ ទី៩ ខែមេសា រដ្ឋមន្ត្រីក្រសួងការបរទេសកម្ពុជា លោក ហោ ណាំហុង បានដឹកនាំគណៈប្រតិភូអ្នកជំនាញច្បាប់ និងអ្នកជំនាញផែនទីកម្ពុជា ទៅកាន់តុលាការយុត្តិធម៌អន្តរជាតិ។ លោក ហោ ណាំហុង ប្រាប់អ្នកសារព័ត៌មានក្នុងសន្និសីទកាសែត មុននឹងចាកចេញថា ភាគីកម្ពុជា នឹងទទួលបានជោគជ័យ កម្ពុជា មានឯកសារគ្រប់គ្រាន់ទទួលស្គាល់ជាអន្តរជាតិថា ប្រាសាទព្រះវិហារ និងដីទំហំ ៤,៦គីឡូម៉ែត្រក្រឡា នៅក្បែរប្រាសាទនោះ ជាកម្មសិទ្ធិរបស់ខ្មែរ។
ភាគីកម្ពុជា មានអ្នកជំនាញច្បាប់ និងអ្នកជំនាញផែនទីកម្ពុជា ទាំងបរទេស និងជាតិ សរុបចំនួន ១២នាក់។ តុលាការ ICJ នៅទីក្រុងឡាអេ នឹងបើកសវនាការលើសំណុំរឿងប្រាសាទព្រះវិហារ ចាប់ពីថ្ងៃទី១៥ ដល់ថ្ងៃទី១៩ ខែមេសា ឆ្នាំ២០១៣ ចំថ្ងៃចូលឆ្នាំរបស់កម្ពុជា និងថៃ។ ICJ គ្រោងនឹងប្រកាសសាលដីកានៅចុងឆ្នាំ២០១៣នេះ៕ ប្រភពពី សំឡេងប្រជាធិបតេយ្យ VOD
