ស្នងការដ្ឋាននគរបាលរាជធានីភ្នំពេញ ដាក់កម្លាំង១០០នាក់ និងរថយន្តពន្លត់អគ្គីភ័យ ចំនួន២០គ្រឿង នៅគោលដៅ៧កន្លែងផ្សេងៗ នៅរាជធានីភ្នំពេញ ដើម្បីត្រៀមខ្លួនពន្លត់អគ្គីភ័យដែលកើតឡើងជាយថាហេតុ ក្នុងឱកាសចូលឆ្នាំចាប់ពីថ្ងៃទី១៤ ដល់១៦ខែមេសានេះ។
ប្រធានការិយាល័យនគរបាលបង្ការ និងពន្លត់អគ្គីភ័យនៃស្នងការដ្ឋាននគរបាលរាជធានីភ្នំពេញ លោក នេត វន្ថា មានប្រសាសន៍ថា កម្លាំង១០០នាក់ និងរថយន្ត២០គ្រឿងនោះ ដាក់នៅគោលដៅ៧ផ្សេងគ្នា គឺខណ្ឌចំការមន ខណ្ឌឫស្សីកែវ ខណ្ឌពោធិ៍សែនជ័យ ខណ្ឌសែនសុខ ខណ្ឌទួលគោក ខណ្ឌខណ្ឌមានជ័យ និងកន្លែងអគ្គនាយកដ្ឋានអង្គរក្ស។
លោក នេត វន្ថា បានណែនាំឲ្យប្រជាពលរដ្ឋទាក់ទងលេខប្រចាំការ២៤ម៉ោង សម្រាប់ពន្លត់អគ្គីភ័យគឺ៦៦៦ ប្រសិនបើមានអគ្គីភ័យកើតឡើង។ លោកក៏បានអំពាវឲ្យប្រជាពលរដ្ឋត្រូវមានការប្រុងប្រយ័ត្នខ្លួនឯង ផងដែរ ដើម្បីបង្ការ និងទប់ស្កាត់អគ្គីភ័យ។
សូមជម្រាបថា ក្នុង៤ខែដើមឆ្នាំ២០១៣នេះ អគ្គីភ័យកើតឡើងនៅរាជធានីភ្នំពេញមានចំនួន៤២លើក ដែលបង្ករដោយផ្ទុះចរន្តអគ្គិសនី និងធ្វេសប្រហែសពេលចំអិនអាហារជាដើម។ តែទោះយ៉ាងណា ប្រធានការិយាល័យនគរបាលបង្ការ និងពន្លត់អគ្គីភ័យនៃស្នងការដ្ឋាននគរបាលរាជធានីភ្នំពេញ លោក នេត វន្ថា បញ្ជាក់ថា អគ្គីភ័យទាំង៤២លើកនោះ គឺកើតឡើងជាទ្រង់ទ្រាយតូច មិនបង្ករការខូចខាតធ្ងន់ធ្ងរទេ៕ប្រភពពី សំឡេងប្រជាធិបតេយ្យ VOD
