អាចនឹងមានស្លាប់ជាច្រើនសិបនាក់ និងរបួសរាប់រយនាក់ ក្នុងគ្រោះរញ្ជួយដី នៅខេត្តស៊ីឈ័ន កណ្តាលអាធ្រាត្រយប់មិញ ក្នុងកំរិត ៦,៦ គិតតាមមាត្រដ្ឋានរីស្ទែរ។ អាជ្ញាធរចិន ដែលបានបង្ហាញ តួលេខបណ្តោះអាសន្ន ភ្លាម ថាមានស្លាប់យ៉ាងហោចណាស់ ៥៦នាក់ និងរបួសជាងប្រាំមួយរយនាក់ បានបញ្ជូនកម្លាំងយោធារាប់ពាន់នាក់ទៅជួយសង្គ្រោះប្រជាជន។
តំបន់ស៊ីឈ័នរងគ្រោះរញ្ជួយដីថ្ងៃទី ២០មេសា ថតពីលើអាកាស
៥ឆ្នាំក្រោយការរញ្ជួយដីមរណៈឆ្នាំ២០០៨ ដែលកាលណោះមានមនុស្សស្លាប់និងបាត់ខ្លួន ជាង៨ម៉ឺន៧ពាន់នាក់ យប់មិញតំបន់ខ្ពង់រាបទីបេនៃខេត្តស៊ីឈ័ន បានរងគ្រោះរញ្ជួយដីធ្ងន់ធ្ងរមួយទៀត ក្នុងកំរិត ៦,៦នៃមាត្រដ្ឋានរីស្ទែរ។ អាគារ សំណង់ចាស់ៗ ផ្ទះសម្បែងប្រជាជនរាប់សិបខ្នងដួលរលំបាក់ ក្លាយជាបំណែកថ្មតូចៗ ស្ទើររាបស្មើដី ! នេះបើយោងតាមរូបថតថតពីលើអាកាសក្រោយហេតុការណ៍រញ្ជួយដីភ្លាម។
ស្រទាប់រញ្ជួយស្ថិតនៅក្រោមដីតែ១២គីឡូម៉ែត្រតែប៉ុណ្ណោះ ទើបគ្រោះថ្នាក់ដូចជាមិនសូវធ្ងន់ធ្ងរខ្លាំង ប៉ុន្តែព្រះធរណីបានរញ្ជួយ អង្រួនដល់ក្រុងឆងឌូ របស់ស៊ីឈ័ននិងខេត្តចុងឈឹងជិតខាង ទៅដាស់បណ្តាជនស៊ីឈ័នដែលភាគច្រើនកំពុងលង់លក់ ឱ្យភ្ញាក់រត់ប្រផាប់ប្រផីង។
ស៊ីឈ័ន ជាខេត្តមានបណ្តាជនរស់នៅច្រើនជាងគេបំផុតមួយរបស់ចិន និងស្ថិតនៅតំបន់ងាយរញ្ជួយដី ហេតុដូច្នេះហើយទើបលោកប្រធានាធិបតីចិនថ្មី ស៊ីជីនពីង បានស្នើសុំឱ្យអាជ្ញាធរគ្រប់ជាន់ថ្នាក់រួមគ្នាជួយសង្គ្រោះ។ ចំណែកនាយករដ្ឋមន្ត្រី លោក លី ឃឺឈាំង បានប្រកាសថានឹងអញ្ជើញទៅកាន់តំបន់រងគ្រោះដោយផ្ទាល់។ ទាហានប្រមាណជាង២០០០នាក់ ត្រូវបញ្ជូនជាបន្ទាន់ទៅធ្វើប្រតិបត្តិការសង្គ្រោះ បន្ថែមលើកម្លាំងដែលនឹងកន្លែងស្រាប់ ដើម្បីជួយប្រជាជន និងនិស្សិត ដែលកំពុងជាប់កុនក្នុងបំណែកអាគារ។ សំណង់ អាគារ នៅតាមតំបន់ជនបទចិនល្បីខាងមានគុណភាពអន់ មិនគោរពតានបទដ្ឋានសុវត្ថិភាពប្រឆាំងនឹងគ្រោះរញ្ជួយដី៕ប្រភពពី (RFI)
