កំពង់ឆ្នាំង ៖ បុរសស្រវឹងជោកម្នាក់ត្រូវបានអ្នកស្រុកក្នុងភូមិព្រួតគ្នាចាប់ ខ្លួនបាន បន្ទាប់ពីរូបគេបានចាប់រំលោភស្ត្រីម្នាក់កំពុងដេកក្នុងមុងមិនបាន សម្រេច ហើយត្រូវជនរងគ្រោះស្រែកឲ្យគេជួយ។
ហេតុការណ៍ នេះបានកើតឡើងកាលពីវេលាម៉ោង ២៣និង៣០នាទីយប់ ថ្ងៃទី១៨ ខែមេសា ឆ្នាំ២០១៣ នៅក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង។
លោក វរសេនីយ៍ត្រី លឹម ហាក់ នាយការិយាល័យស្រាវជ្រាវបទល្មើសព្រហ្មទណ្ឌកងរាជអាវុធហត្ថខេត្តបាន និយាយឲ្យដឹងថា ជនល្មើសខាងលើនេះឈ្មោះ យិន ផល្លា អាយុ៤១ឆ្នាំមានទីលំនៅភូមិព្រែកប៉ុន ឃុំព្រែកស្ដី ស្រុកកោះធំ ខេត្តកណ្ដាល មកស្នាក់នៅផ្ទះមិត្តភក្ដិក្នុងភូមិចុងកោះ រយៈពេល៣ថ្ងៃហើយ ដើម្បីរកការងារធ្វើ។ នៅវេលាម៉ោង២៣ និង៣០នាទីយប់ ក្រោយពីរូបគេផឹកស្រាស្រវឹងជោកជាំ គេបានឡើងទៅផ្ទះស្ត្រីឈ្មោះ ស.យ អាយុ៥៥ឆ្នាំ ដែលកំពុងដេកលង់លក់ក្នុងមុងម្នាក់ឯង ប្ដីទៅចាំចំការ។ ពេលនោះជនល្មើសក៏បានបើកមុជចូលចាប់ឲ្យនាងពីក្រោយប៉ុនប៉ងចាប់រំលោភ ប៉ុន្តែនាងដឹងខ្លួន បានធំក្លិនស្រាដឹងថាមិនមែនជាប្ដីខ្លួន ក៏បានប្រតាយប្រតប់ជាមួយជនល្មើស បន្ទាប់មកជនល្មើសក៏បានរត់ផុងជើងនឹងក្ដារដួល ខណៈនោះនាងក៏ស្រែកឲ្យគេជួយ។ ស្របពេលនោះដែរអ្នកស្រុកក្នុងភូមិដែលកំពុងរាំធុងបាសនៅក្បែរនោះ ក៏បានរត់មកជួយព្រួតគ្នាចាប់ខ្លួនជនល្មើស ហើយនាំគ្នាស្វាគមន៍ម្នាក់មួយដៃ ហើមមុខពោរ បន្ទាប់មកក៏ប្រគល់ខ្លួនឲ្យសមត្ថកិច្ចកងរាជាអាវុធហត្ថខេត្ត។ នៅល្ងាចម៉ោង១៦និង៣០នាទីថ្ងៃទី១៩ ខែមេសា ឆ្នាំ២០១៣ ពេលអ្នកសារព័ត៌មានទៅថតរូបជនល្មើស គឺរូបគេនៅស្រវឹងក្អួត ដើរទ្រេតទ្រោតមិនទាន់ស្វាងស្រានៅឡើយ។
ករណីនេះ សមត្ថកិច្ចកងរាជអាវុធហត្ថខេត្តបានកសាងសំណុំរឿងចោទពីបទរំលោភ មិនបានសម្រេច ហើយត្រូវបញ្ជូនខ្លួនជនល្មើសទៅសាលាដំបូងខេត្តនៅព្រឹកថ្ងៃទី២០ ខែមេសា ឆ្នាំ២០១៣ ដើម្បីឲ្យតុលាការចាត់ការបន្តតាមច្បាប់៕ប្រភពពីកម្ពុជាថ្មី
ថារិទ្ធ
