ហេតុការណ៍នេះ បានកើតឡើងកាលពី វេលាម៉ោង៩និង៣០នាទីព្រឹកថ្ងៃទី២៧ ខែ មេសា ឆ្នាំ២០១៣ នៅតាមបណ្ដោយផ្លូវ ២០០៤ ខាងមុខសាលាណតប្រ៊ីត សង្កាត់ ទឹកថ្លា ខណ្ឌសែនសុខ ។
មន្ដ្រីនគរបាលប៉ុស្ដិ៍ទឹកថ្លា ដែលទទួល ពាក្យបណ្ដឹងពីស្ដ្រីរងគ្រោះ បានឱ្យដឹងថា មុនពេលកើតហេតុ ស្ដ្រីជនជាតិជប៉ុន វ័យ៣៨ ឆ្នាំរូបនេះ ដែលបម្រើការងារនៅ អង្គការសាយបាយសាយ បានធ្វើដំណើរតាម ម៉ូតូកង់បី ចេញពីផ្ទះរបស់ខ្លួនម្ដុំទួលទំពូង ឆ្ពោះទៅកន្លែងធ្វើការ ។ ពេលស្ដ្រីរងគ្រោះ ធ្វើដំណើរដល់ចំណុច កើតហេតុខាងលើ ស្រាប់តែលេចមុខជនសង្ស័យម្នាក់ ជិះម៉ូតូ ម៉ាកវីវ៉ា ពណ៌ខ្មៅ មួយគ្រឿង មិនចាំស្លាក លេខ គ្រាន់តែដឹងថា លេខដំបូង គឺ 1M ធ្វើ សកម្មភាព ឆក់កាបូបពីស្ដ្រីរងគ្រោះគេចខ្លួន បាត់ដោយសុវត្ថិភាព ។
បើតាមស្ដ្រីរងគ្រោះនៅក្នុងកាបូប ក្រៅ ពីលុយជាង៤ពាន់ដុល្លារ នៅមានទ្រព្យសម្បត្ដិ និងសម្ភារៈមួយចំនួនទៀត ដូចជាទូរស័ព្ទ ចំនួន២គ្រឿង លិខិតឆ្លងដែនមួយ លេខ PH ៨១៦៧៤០០ និងកាតអេធីអឹមផងដែរ។
ស្ដ្រីរងគ្រោះរូបនេះ បានចូលមកប្រទេស កម្ពុជា កាលពីថ្ងៃទី១០ ខែមេសា ឆ្នាំ២០១៣ ។
យ៉ាងណាក៏ដោយ ក្រោយកើតហេតុ កម្លាំងនគរបាល បន្ទាប់ពីទទួលពាក្យបណ្ដឹងពីស្ដ្រីរងគ្រោះ បានសន្យាថា នឹងបន្ដធ្វើការស្រាវជ្រាវ ស្វែងរកចោរឆក់ខាងលើនេះ។
មន្ដ្រីនគរបាលមួយរូប បានឱ្យដឹងថា ក្រោយពីមានសកម្មភាពឆក់ ជាពិសេសកើត ឡើងលើជនបរទេសនោះ ស្នងការនគរបាល រាជធានីភ្នំពេញ លោកឧត្ដមសេនីយ៍ ជួន សុវណ្ណ បានបញ្ជាឱ្យកម្លាំងនគរបាល តាម បណ្ដាលគោលដៅជិះតាមពីក្រោយជនបរទេស ដែលជិះម៉ូតូកង់បី និងម៉ូតូឌុបជាដើម។ដោយ៖ ដើមអម្ពិល
