ភ្នំពេញ ៖ នៅរសៀលថ្ងៃទី១៧ ខែមេសា ឆ្នាំ២០១៣នេះ កូនប្រុសឧកញ៉ាដួង ងៀប ដែលល្បីឈ្មោះជាជើងកន្ត្រៃហោះខាងអុកឡុកបង្កអសន្តិសុខនៅរាជធានី ភ្នំពេញ ត្រូវបានកងរាជអាវុធហត្ថបញ្ជូនខ្លួនទៅតុលាការចោទប្រកាន់តាម ផ្លូវច្បាប់។
ប្រភព ព័ត៌មានបានឲ្យដឹងថា តុលាការរាជធានីភ្នំពេញអាចចោទប្រកាន់ក្រុមក្មេងទំនើងជាកូនប្រុស ឧកញ៉ាដួង ងៀប ពីបទហិង្សាដោយចេតនា ប្រើប្រាស់ដោយអាវុធ និងចោទប្រកាន់ពីបទប្រើប្រាស់អាវុធខុសច្បាប់ ហើយជនត្រូវចោទដែលសមត្ថកិច្ចឃាត់ខ្លួនបញ្ជូនទៅតុលាការនោះមាន ឈ្មោះ ដួង គឹមឡុង អាយុ១៧ឆ្នាំ និងម្នាក់ទៀតមានឈ្មោះ ដួង ឆាយ អាយុ២០ឆ្នាំ សមត្ថកិច្ចកំពុងតាមរកឃាត់ខ្លួន។
គួរបញ្ជាក់ថា នៅយប់ថ្ងៃទី ១២ ខែមេសា កន្លងទៅនេះនៅទីតាំងលក់បបរ.ស មួយកន្លែងដែលស្ថិតក្នុងសង្កាត់បឹងកេងកង១ ខណ្ឌចំការមន មានក្មេងទំនើងមួយក្រុមមានប្រុសមានស្រីប្រមាណ ជា ១០ នាក់ បានធ្វើសកម្មភាពវាយប្រហារទៅលើជនរងគ្រោះយ៉ាងសាហាវបំផុតដោយ គ្រាន់តែ ភាគីខាងរងគ្រោះនិយាយភាសាអង់គ្លេស និងជូនពរគ្នាក្នុងឱកាសបែកគ្នាខណៈដែលក្រុមជនរងគ្រោះហូបបបរ.ស នៅតុ ក្បែរក្រុមជនបង្ក។ សាក្សីកន្លែងកើតហេតុបាននិយាយដោយរន្ធត់ចិត្តថា គាត់មិនធ្លាប់ឃើញពីសកម្មភាពសាហាវបែបនេះទេ សកម្មភាពបែបនេះធ្លាប់តែឃើញ និងលឺគេនិយាយក្នុងខ្សែភាពយន្ត។
សាក្សី បន្តថា ក្រុមជនបង្កមិនមែនត្រឹមតែវាយទៅលើជនរងគ្រោះដែលធ្លាប់ស្គាល់ គ្នា ប៉ុណ្ណោះទេ ថែមទាំងវាយតុកៅអី សម្ភារៈ ក្នុងហាងមួយចំនួន ដើម្បីសំដែងរិទ្ធិអោយជនទាំងពួងនៅក្បែរនោះបាក់ស្បាត។
ជន រងគ្រោះបានប្រាប់អោយដឹងថា ខ្លួនមិនដែលធ្លាប់ស្គាល់ក្រុមជនបង្កទេ ខណៈដែលខ្លួន និងមិត្តភក្តិ ៤នាក់ នាំគ្នាមកញ៉ាំបបរ.ស មុនបែកគ្នា ហើយជនរងគ្រោះគ្រាន់តែហៅ អ្នករត់តុមកកំម៉ង់ម្ហូបក៏គេស្រែកសំឡុត ដោយឃើញពួកគេមានគ្នាច្រើន ខ្លួនក៏អោនមុខចុះហើយហូបបន្តទៀត។ បន្ទាប់មកក៏បានលើកទឹកតែជូនពរគ្នា ក៏ស្រាប់តែមានចង្កឹះចាន ស្លាបព្រា ហោះមកលើខ្លួនរួមទាំងបក្ខពួករបស់គេមានមិត្តភក្តិ និងអង្គរក្សរួមមានទាំងកាំភ្លើងបានវាយស្រោចលើរូបគេ ធ្វើអោយគេរបួសធ្ងន់ហើយចូលទៅសង្ងំចាក់សោរក្នុងបន្ទប់ទឹក។
ទោះ បីជាក្រុមជើងកន្ត្រៃហោះធ្វើសកម្មភាពកក្រើក ផ្អើលទាំងពលរដ្ឋក្បែរនោះយ៉ាងណាក៏ដោយក៏គេមិនឃើញមានសមត្ថកិច្ច មូលដ្ឋានចុះមកអន្តរាគមន៍នោះទេ។ ពេលក្រុមបង្កចេញទៅបាត់ស្រមោលទើបសមត្ថ កិច្ចមូលដ្ឋានចុះមកដល់។ ក្រោយពីទទួលពាក្យបណ្តឹងពីជនរងគ្រោះថ្ងៃបន្ទាប់កងរាជអាវុធ ហត្ថរាជធានីភ្នំពេញ និងខណ្ឌដូនពេញ ក៏បានតាមចាប់ជនដៃដល់ និងបក្ខពួក។កងរាជអាវុធហត្ថក៏បានឃាត់ខ្លួនបក្ខពួកជនដៃដល់ និងឡោមព័ទ្ធកន្លែងស្នាក់នៅរបស់ជនបង្កដែលសាក្សីអះអាងថា មានឈ្មោះ ឆាយ ត្រូវបានគេស្គាល់ថា ជាកូនប្រុសរបស់លោក ឧកញ៉ា ដួង ងៀប។
ដោយ ការស្រាវជ្រាវតាមជំនាញនៅល្ងាចថ្ងៃទី១៤ ខែមេសា កម្លាំងការិយាល័យជំនាញក្រោមការបញ្ជាផ្ទាល់របស់លោកឧត្តមសេនីយ៍ ទោយ៉ា គឹមអ៊ី បានសហការជាមួយខាងតុលាការ ដឹកនាំចុះឆែកឆេរ និងចាប់ខ្លួនផ្ទាល់ដោយលោកព្រះរាជអាជ្ញារង ហៀង សុភ័ក្ត្រ ឈានដល់ការឃាត់ខ្លួនកូនប្រុសលោកឧកញ៉ាដួង ងៀប(ដួង គឹមឡុង) បាន ម្នាក់នៅក្នុងខន់ដូមួយដែលគេដឹងថា ជារបស់លោកឧកញ៉ាដួង ងៀប ជួលឲ្យជនបរទេសនៅក្បែរសណ្ឌាគាកាំបូឌីយ៉ាណា។ ក្នុងការឃាត់ខ្លួននោះកម្លាំងចម្រុះបានដកហូតអាវុធខ្លីមួយដើម ម៉ាក រឡូពីឈ្មោះ ដួង គឹមឡុង និងដកហូតកាំភ្លើងAKស្វាយ បត់មួយគ្រឿងទៀតពីក្នុងឡានមែកសឺដេសពណ៌ស របស់កូនលោកឧកញ៉ាដួង ងៀប រួមនឹងរថយន្តទាំងមួយគ្រឿងទៀតម៉ាកអ៊ីនហ្វីនីទីហ្វ។ចំណែកជន បង្កដ៏សាហាវនោះបានគេចខ្លួនបាត់ស្រមោល។ ប៉ុន្តែសមត្ថកិច្ចបានឃាត់ខ្លួនកូនប្រុសលោកឧកញ៉ាដួង ងៀប ដែលត្រូវចាប់ខ្លួនមានឈ្មោះ ដួង គឹមឡុង អាយុ១៧ឆ្នាំ ដើម្បីបញ្ជូនទៅកាន់តុលាការ៕ប្រភពពីកម្ពុជាថ្មី
