មួញដឹក ឈើគ្រញូង ប្រើល្បិចចាស់ ជាប់អន្ទាក់ សមត្ថកិច្ច

កំពង់ឆ្នាំងៈ រថយន្ត បន្លំដឹកស្រូវ ពីលើឈើគ្រញូង ពីក្រោមមួយគ្រឿង ត្រូវបានកម្លាំង នគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាល ខេត្តកំពង់ឆ្នាំង មានការសង្ស័យ ហើយធ្វើការស្ទាក់ចាប់បាននៅវេលា ម៉ោង៣និង៣០នាទី រសៀលថ្ងៃទី២៨ ខែមេសា ឆ្នាំ២០១៣ នៅតាមបណ្តោយផ្លូវជាតិលេខ៥ ស្ថិតនៅក្នុងភូមិ ស្រះកែវ ឃុំមេលំ ស្រុកបរិបូណ៌ ខេត្តកំពង់ឆ្នាំង។
លោក ជិន សុផាត នាយការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាល ខេត្តកំពង់ឆ្នាំង បានឲ្យ ដឹងថា ការឃាត់រថយន្តបន្លំដឹក ស្រូវពីលើឈើ គ្រញូងពីក្រោម គឺធ្វើឡើងដោយមានបទបញ្ជាផ្ទាល់ របស់លោក ឧត្តមសេនីយ៍ត្រី អាត់ ខែម ស្នងការនគរបាលខេត្តកំពង់ឆ្នាំង និងបានឆ្លងយោបល់ លោក ពេញ វិបុល ព្រះរាជអាជ្ញា អមសាលាដំបូង ខេត្តកំពង់ឆ្នាំង  ។ លោក ជិន សុផាត បានបន្តឲ្យដឹងថា រថយន្ត១តោនកន្លះពណ៌ខៀវ ពាក់ស្លាកលេខ ញ 2158 ភព2 បានបង្កប់ដឹកឈើគ្រញូងពីក្រោម ដោយដាក់ស្រូវពីលើចេញ ពីខេត្តសៀមរាប ដោយធ្វើដំណើរឆ្លងកាត់ទឹកដី ខេត្តកំពង់ឆ្នាំង ឆ្ពោះទៅកាន់ខេត្តកំពង់ចាម ។ ក្នុងយុទ្ធនាការខាងលើកម្លាំងនគរបាល បានឃាត់រថយន្តខាងលើ នាំយកមកកាន់ស្នងការដ្ឋាន នគរបាលខេត្តកំពង់ឆ្នាំង តាំងពីរសៀលថ្ងៃម្សិលម៉ិញ   ព្រមជាមួយគ្នានេះ កម្លាំងសមត្ថកិច្ច បានឃាត់ ខ្លួន អ្នកបើកបររថយន្តឈ្មោះ ញ៉ែម វណ្ណដេត ភេទប្រុស អាយុ២២ឆ្នាំ មានទីលំនៅភូមិពោធិ៍ ស្រុកត្បូងឃ្មុំ ខេត្តកំពង់ចាម និងព្រូម្នាក់ទៀត ឈ្មោះ ហូ ប៊ុនរិត អាយុ២៦ឆ្នាំ រស់នៅ ភូមិស្លាបក្តោង ស្រុកត្បូងឃ្មុំ ខេត្តកំពង់ចាម ។
នៅព្រឹកថ្ងៃទី២៩ ខែមេសា ឆ្នាំ២០១៣ កម្លាំងសមត្ថកិច្ចចំរុះ មានមន្ត្រីរដ្ឋបាលព្រៃឈើខេត្ត និងនគរបាល ប្រឆាំងបទល្មើសសេដ្ឋកិច្ចខេត្ត ដឹកនាំដោយលោក ព្រះរាជអាជ្ញា ពេញ វិបុល និង លោក ទិត ចយ ស្នងការរង នគរបាលខេត្តកំពង់ឆ្នាំង បានធ្វើការឆែកឆេរ ត្រួតពិនិត្យ វាស់វែងជាក់ស្តែង រកឃើញឈើគ្រញូង១៩៥ដុំ ស្មើនឹង ៨៩៧គីឡូក្រាម ។
រថយន្តនិងវត្ថុតាងឈើគ្រញូង ត្រូវបានប្រគល់ជូនខណ្ឌរដ្ខបាលព្រៃឈើ ខេត្តកំពង់ឆ្នាំង ជាអ្នករក្សាទុក រីឯអ្នកបើក បររថយន្ត និងព្រូ ត្រូវបានកម្លាំងនគរបាល ប្រឆាំងបទល្មើសសេដ្ឋកិច្ច កសាងសំណុំរឿងបញ្ជូន ទៅកាន់សាលាដំបូង ខេត្តកំពង់ឆ្នាំង តាមនីតិវិធីច្បាប់ ៕
ដោយ៖ ដើមអម្ពិល