ប្រភពព័ត៌មានពីសមត្ថកិច្ចបានឲ្យដឹងថា ជនសង្ស័យមានគ្នា ២នាក់ជិះម៉ូតូស្កុបពី ពណ៌ស ស៊េរី២០១៣ បានធ្វើសកម្មភាពឆក់ទូរស័ព្ទ ពីស្រ្តីជនជាតិចិនដែលកំពុងអង្គុយលេងហ្គេម នៅលើរ៉ឺម៉កម៉ូតូជិះគ្នា៣នាក់ ប្តីប្រពន្ធនិងបុរសម្នាក់ទៀតជាជនជាតិចិន បានឈប់អែមនៅចិញ្ចើមផ្លូវ ស្រាប់តែជនសង្ស័យជិះម៉ូតូមកដល់ ឆក់យកទូរស័ព្ទនោះ បានសម្រេច ហើយជិះម៉ូតូគេចខ្លួនទៅបាត់ ។ ដោយសារទូរស័ព្ទនោះ មានភ្ជាប់ប្រព័ន្ធ GPS ទើបបុរសជាប្តីស្រ្តីរងគ្រោះបានបើកទូរស័ព្ទរបស់គាត់មួយគ្រឿងទៀត ដែលមានភ្ជាប់ប្រព័ន្ធ GPS ដែរ បើកមើល ដឹងថា ជនសង្ស័យស្ថិតនៅក្នុងសង្កាត់មិត្តភាព ខណ្ឌ៧មករា ក៏រាយទៅនគរបាលខណ្ឌទួលគោក ហើយនគរបាលខណ្ឌទួលគោកបានសហការជាមួយខណ្ឌ ៧មករា ធ្វើការចុះទៅឃាត់ខ្លួនជនសង្ស័យនៅផ្ទះលេខ 265E2Z ផ្លូវលេខ១២៨ សង្កាត់មិត្តភាព ខណ្ឌ៧មករា ។
ជនសង្ស័យជាអ្នកបើកម៉ូតូឈ្មោះ បេ រ៉ាវី ភេទប្រុស អាយុ ២០ឆ្នាំ មុខរបរជាងជួសជុលម៉ាស៊ីនត្រជាក់ ស្នាក់នៅផ្ទះលេខ 418Eo ផ្លូវលេខ១២៨ សង្កាត់មិត្តភាព ខណ្ឌ៧មករា និងមិត្តភក្តិជា អ្នកធ្វើសកម្មភាពឆក់ឈ្មោះ មន្ត ដារ័ត្ន ភេទប្រុស អាយុ ២៥ឆ្នាំ មុខរបរជាងបាញ់ថ្នាំតុទូ ស្នាក់នៅផ្ទះលេខ 418E1 ផ្លូវលេខ១២៨ សង្កាត់មិត្តភាព ខណ្ឌ៧មករា ។
ក្រោយពេលឃាត់ខ្លួនជនសង្ស័យបានសារភាពថា ម៉ូតូដែលគេជិះធ្វើសកម្មភាពនេះ ខ្ចីម៉ូតូរបស់សង្សារគេទេ ដោយប្រាប់ថា ជិះទៅឥវ៉ាន់បន្តិច ។ ជនសង្ស័យសារភាពថា ទូរស័ព្ទដែលឆក់បាននោះ ពួកគេបានយកទៅឲ្យមិត្តភក្តិឈ្មោះ ស្កាយ ដែលកំពុងអង្គុយលេងអ៊ិនធើរណេត នៅក្នុងហាងហុងកុង ជាអ្នកយកទៅលក់ ។ ខណៈពេលសមត្ថកិច្ចឲ្យជនសង្ស័យ នាំទៅរកឈ្មោះ ស្កាយនោះ បែរជារកឈ្មោះនោះ មិនឃើញទេ ។ ជនសង្ស័យកំពុងកសាងសំណុំរឿង នៅខណ្ឌទួលគោក ៕ ប្រភព ប្រភព អង្គរធំ មេឌា
