នាពេលថ្មីៗនេះ លោក កែវ វាសនា តារាចម្រៀងរបស់សាន់ដេត្រូវបានសារព័ត៌មានមួយចំនួនបានសរសេរចុះផ្សាយ ថារូបលោកពូកែញ៉ែស្រីមិនរើសមុខ និងមានសង្សារច្រើន។ ដោយសារតែការចុះផ្សាយមិនមានមូលដ្ឋានច្បាស់លាស់យ៉ាងដូច្នេះ ទើបលោក កែវ វាសនា បានថតជាវីដេអូក្លីបបង្ហោះក្នុងបណ្ដាញសង្គមបកស្រាយពីបញ្ហានេះ។
នៅ ក្នុងវីដេអូក្លីបនោះ លោក កែវ វាសនា បាននិយាយថា គ្រាន់តែឃើញគេចុះផ្សាយបែបហ្នឹងភ្លាម រូបលោកហួសចិត្ត ព្រោះវាប្រាសចាកពីការពិតពេក។ រាល់ថ្ងៃរូបលោករវល់ការងារជាខ្លាំង ជាពិសេសជាប់រវល់ជាមួយខនសឺតតាមបណ្ដាខេត្តរៀងរាល់ថ្ងៃ គេងមិនបានពេញភ្នែកផង ហើយលោកក៏គ្មានពេលវេលាគ្រប់គ្រាន់ឱ្យផលិតកម្ម ដើម្បីថតបទចម្រៀងថ្មីៗទៀតផង។ តើរូបលោក មានពេលវេលាឯណាទៅមានសង្សារ ឬស្រីស្នេហ៍ផ្លាស់ប្ដូរញ៉ែមិនរើសមុខដូចគេចុះផ្សាយនោះ?
