គូ​ស្នេហ៍​ភក្តី រួម​មេត្រី​ក្បែរ​ទ្រុង​ជ្រូក


នាងចិន អៀម និងលោកអេន តេន (ក្នុង​ថ្ងៃ​សែនព្រេន), នាងចិន អៀម និងកូន, លោកតា​អន ព្រឿន, នាងមឿន លី និងនាងឃុត ណារិន (រូបតូចខាងស្តាំ) 
យុវ​វ័យ​សម័យ​នេះ ឱ្យ​តែ​ស្រលាញ់​គ្នា​ស្មោះ ទោះ​ជាត្រូវ​ឡើងភ្នំ ចុះ​ជ្រោះ ដើរ​កាត់​បន្លា ក៏​គេ​មិន​រួញ​រា​ដែរ ធ្វើ​យ៉ាង​ណា​ឱ្យ​តែ​បាន​ជួប​គ្នា​រួម​មេត្រី។ យ៉ាង​ណា​មិញ គូស្នេហ៍​ក្មេងៗ​នេះ បាន​បណ្តុះ​ពន្លក​ស្នេហ៍​ក្បែរ​ទ្រុង​ជ្រូក តែ​ម៉ែ​ឪ​មិន​ឱ្យ​លូក​លាន់​គ្នា ក៏​នាំ​គ្នា​រត់ លុះ​បាន​កូន​១ ទើប​ចាស់​ៗ សែនព្រេនឱ្យ​ទៅ ព្រោះ​បំបែក​មិន​កើត...។ នាងចិន អៀម អាយុ២០ឆ្នាំ រស់នៅ​ភូមិគៀត ឃុំពោធិ៍អង្គ្រង ស្រុក​បរសេដ្ឋ ខេត្តកំពង់ស្ពឺ បានរៀប​រាប់​ថា រូបនាងជាកូនច្បងក្នុងចំណោម​បងប្អូន៣នាក់ ឪពុកឈ្មោះ អ៊ុំ អ៊ុន អាយុ៥៥ឆ្នាំ ម្តាយឈ្មោះជឿន អាយុ​៥៤ឆ្នាំ។ នាងមានស្រុកកំណើតនៅ ជាប់បឹងទន្លេសាប ក្នុងខេត្ត​ពោធិ៍សាត់ ឯណោះទេ ប៉ុន្តែ ដោយ​នៅ​ស្រុកពិបាករកស៊ី ពេក ម៉ែឪ​ក៏ធ្​វើចំណាកស្រុក ទៅរស់នៅខេត្តបន្ទាយមានជ័យ ជាហេតុនាំឱ្យនាងរៀន សូត្របានតិចតួចណាស់ ព្រោះរវល់តែជួយរកស៊ីឪពុកម្តាយ។ គ្រួសារនាងបានប្រកប មុខរបរចិញ្ចឹម​ដង្កូវ​នាង យកសូត្រលក់ និងស៊ីឈ្នួលធ្វើចម្ការឱ្យគេផង ដោយមាន ជីវភាពត្រឹមតែរស់ប៉ុណ្ណោះ។ នៅពេលនាងមានអាយុ១៧ឆ្នាំ ក៏បានស្គាល់កំលោះម្នាក់ ឈ្មោះអន តេន អាយុបងនាង៥ឆ្នាំ ដែលរសាត់អណ្តែតពីស្រុកកំណើត មកធ្វើជាកម្មករចិញ្ចឹមជ្រូក ឱ្យថៅកែម្នាក់ នៅខេត្តបន្ទាយមានជ័យ មិនឆ្ងាយពីផ្ទះនាង។ មិត្តភាព ក៏ក្លាយទៅជា​សេចក្តី​ស្នេហាយ៉ាងឆាប់រហ័ស ដោយពួកនាងតែងណាត់ជួបគ្នាក្បែរ ទ្រុងជ្រូក ជួនកាល កំលោះតេន បានមកលេងដល់ផ្ទះរបស់នាងតែម្តង។ បន្ទាប់ពីស្គាល់ ចិត្តថ្លើមគ្នា​មក នាងបានជំរុញសង្សារឱ្យចូលស្តីដណ្តឹងនាងតាមប្រពៃណី ប៉ុន្តែ ដោយសារម៉ែឪគេនៅឆ្ងាយពេក ពិបាកអញ្ជើញមក ទើបគេចូលសួរដោយខ្លួនឯងតែម្តង និងមានតែខោ​អាវ​មួយ​ចង្កេះ ធុំក្លិនអាចម៍ជ្រូក។ នាងអៀម បន្តរឿងស្នេហាទៀតថា ពេលឃើញកំលោះតេន គ្មានអ្វីសោះ និងមាន ឋានៈជាកម្មករឱ្យបាយជ្រូក លាងសម្អាតទ្រុងជ្រូកយ៉ាងនេះ ឪពុកម្តាយនាងមិនព្រម លើក​ឱ្យ​ទេ បានទាំងហាមនាងជាកូន មិនឱ្យទាក់ទងគ្នាទៀតផង។ នៅពេលម៉ែឪហាម ឃាត់ នាងធ្វើតាមពួកគាត់តែពីមុខទេ ប៉ុន្តែ ពីក្រោយខ្នងគាត់ នាងតែងស្កាត់ទៅជួប ប្រុសថ្លៃ ដល់ទ្រុងជ្រូក ជាញឹកញាប់ រហូតដល់សុខចិត្តប្រគល់ព្រហ្មចារី ដោយមិន ស្តាយស្រណោះ។ នៅពេលបានដឹងថា ពួកនាងទុំមុនស្រគាល ខុសប្រពៃណី ឪពុក​ម្តាយ​​នាងខឹងសម្បាខ្លាំងណាស់ បានបំបិទសិទ្ធិនាងមិនឱ្យចេញពីផ្ទះ។ ប៉ុន្តែ ដោយសារសេចក្តីស្នេហាទុំជោរដល់កម្រិតទៅហើយនោះ នាងគ្មានជម្រើសអ្វីក្រៅពីឱបបង្វេច​រត់តាមប្រុសជាទីស្រលាញ់ មករស់នៅស្រុកកំណើតរបស់គេ រហូតពេលនេះ។ ដោយឡែក លោកអន តេន អាយុ២៥ឆ្នាំ ជាប្តី បានឱ្យដឹងតាមទូរស័ព្ទថា លោកមានឪពុកឈ្មោះអន ព្រឿន អាយុ៧២ឆ្នាំ ម្តាយស្លាប់ ជាត្រកូលកសិករ មាន ជីវភាពត្រឹមតែ​គ្រប់​ប៉ុណ្ណោះ​។ លោករៀនសូត្របានតិចតួចណាស់ ក៏ចេញពីស្រុកកំណើតក្នុងខេត្តកំពង់ស្ពឺ រសាត់អណ្តែតទៅដល់ខេត្តបន្ទាយមានជ័យ សុំគេចូលធ្វើកម្មករឱ្យបាយជ្រូក បាន​ប្រាក់ខែល្មមតែចិញ្ចឹមខ្លួនរស់។ លោកពិតជាមានទំនាក់ទំនងស្នេហ៍ជាមួយនាងអៀម ក្បែរទ្រុងជ្រូកមែន ប៉ុន្តែ មុនដំបូងចេះរក្សាប្រពៃណីខ្មែរដែរ លុះចូលសួរត្រឹមត្រូវ ម៉ែឪខាងស្រីមិនព្រមលើកឱ្យ ដោយឃើញលោក មានការងារអន់ពេក និងមិនស្គាល់ប្រវត្តិផងនោះ ទើបលោកបបួលស្រីថ្លៃ លេងផ្លូវកាត់ទៅ។ ពេលដឹងថា កូនស្រី​មកជួបលោកក្បែរទ្រុងជ្រូក ពួកគាត់ក៏បិទសិទ្ធិលែងឱ្យលូកតែម្តង ដោយបង្ខាំងស្រីថ្លៃ ឱ្យនៅតែក្នុងផ្ទះ។ ប៉ុន្តែ ដោយសារនាងស្រលាញ់លោកដោយស្មោះ ក៏សុខចិត្តរត់​តាម​លោក មកដល់ស្រុកកំណើត នាខេត្តកំពង់ស្ពឺ។ ពេលបានរួមរស់ជាមួយគ្នាជាប្តីប្រពន្ធ លោក និងនាង ស្រលាញ់គ្នាកាន់តែខ្លាំង ហើយលោកក៏មិននៅស្ងៀមដែរ តែង​ចេញ ទៅធ្វើសំណង់ ឬស៊ីឈ្នួលគេ បានលុយឱ្យប្រពន្ធ មិនដែលដាច់ឡើយ ទើបលោកមិនសូវបាននៅផ្ទះ លុះត្រាតែព្រលប់ៗ ទើបទៅដល់។ នៅពេលប្តីប្រពន្ធលោក​បង្កើត​បានកូនប្រុស១ ក៏នាំគ្នាទៅលេងខេត្តបន្ទាយមានជ័យ ស្រាប់តែឪពុកម្តាយក្មេកបាត់ខឹងអស់រលីង បានទាំងដណ្តើមចៅទៅថើប ដោយក្តី ស្រលាញ់ និងបានសែន​ព្រេន​ឱ្យប្តីប្រពន្ធលោកមួយព្រឹកផង ដើម្បីឱ្យមានខាន់ស្លាត្រឹមត្រូវនឹងគេ ឥឡូវប្រពន្ធមានផ្ទៃពោះកូនទី២ ទៀតហើយ។ លោកតាអន ព្រឿន អាយុ៧២ឆ្នាំ ជាឪពុកខាងប្រុស បានឱ្យដឹងថា ទោះបីជាកូនប្រុសគាត់ បានពង្រត់កូនស្រីគេមក ក៏គាត់មិនហ៊ានបំបែកដែរ តែក៏មិនហ៊ានរៀបការឱ្យដែរ ដរាបណា​ខាងដន្លង មិនទាន់យល់ព្រម។ គាត់យល់ថា ក្មេងៗសម័យនេះ តែប៉ុណ្ណឹង បើពួកគេស្រលាញ់គ្នា យើងជា ចាស់ មិនអាចបំបែកបានឡើយ ចាំតែរៀបការឱ្យទៅ។ ប៉ុន្តែ ឥឡូវកូនទាំងពីរ ក្លាយជាប្តីប្រពន្ធស្របច្បាប់ហើយ បន្ទាប់ពីអ្នកដន្លងនៅខេត្តបន្ទាយមានជ័យ សែនព្រេនឱ្យមក។ នាងមឿន លី អាយុ២៥ឆ្នាំ និងនាងឃុត ណារិន អាយុ២៤ឆ្នាំ ជា អ្នកភូមិ បានឱ្យដឹងស្របគ្នាថា មកពីឪពុកម្តាយមើលស្រាលកូនប្រសាប្រុស ដែលធ្វើកម្មករឱ្យបាយជ្រូក ក៏​ចង់​បំបែក ប៉ុន្តែ នាងអៀម ស្រលាញ់សង្សារ ស្មោះ ក៏សុខចិត្តឱបបង្វេចរត់តាមគ្នា។ ពួកនាងយល់ថា សម័យនេះ កំលោះក្រមុំមានសិទ្ធិស្រលាញ់គ្នា មិនគួរម៉ែឪ​ប្រកាន់​ទ្រឹស្តី “នំមិនធំជាងនាឡិ” ទៀតទេ។ គួរបញ្ជាក់ថា ការដែលឪពុកម្តាយ រើសកូនប្រសាពេក ក៏មិនកើតដែរ ព្រោះជាឧបសគ្គនាំឱ្យកូនពង្រត់គ្នាបំបាក់កិត្តិយសវង្សត្រកូល។ ទោះយ៉ាងណា គូស្នេហ៍ទាំងឡាយ ក៏មិនគួរលេងផ្លូវកាត់ទុំមុនស្រគាល រួចនាំគ្នារត់ទៅសោយសុខនោះទេ ព្រោះទំនៀមទម្លាប់ខ្មែរ មិនអនុញ្ញាតឱ្យកំលោះក្រមុំធ្វើយ៉ាងនេះ ឡើយ។ គេត្រូវចេះដោះស្រាយបញ្ហាដោយសន្តិវិធី ដូចជា ភាគីកូនប្រសា ព្យាយាមបម្រើ យកចិត្តយកថ្លើមម៉ែឪក្មេកជាដើម លុះធ្វើអំពើល្អយូរៗទៅ ពួកគាត់គង់តែអាណិត បើក​សិទ្ធិឱ្យបានជួបគ្នាមិនខាន ៕ ប្រភព akt-media
Next PostNewer Post Previous PostOlder Post Home

About