អគ្គិភ័យនេះបានឆេះសន្ធោសន្ធៅ យប់មិញ ក្នុងមន្ទីរពេទ្យវិកលចរិតនៃទីប្រជុំជន ជាក្រុងរណបមួយរបស់រដ្ឋធានីម៉ូស្គូ។ វាបានផ្តាច់ជីវិតមនុស្សអស់៣៨នាក់ ពីក្នុងនោះ អ្នកជម្ងឺផ្ទាល់គឺ៣៦នាក់ និង២នាក់ទៀតជាគ្រូពេទ្យរបស់គេ។ លោកប្រធានាធិបតីពូទីន តាំងពី ព្រឹកមិញទៅហើយ បានផ្ទុកផ្តាក់ឲ្យធ្វើការស៊ើបអង្កេតយ៉ាងដិតដល់បំផុត អំពីមូលហេតុនៃសោកនាដកម្មគួរឲ្យរន្ធត់នេះ។
សាក្សីម្នាក់ប្រាប់ថា បុរសម្នាក់អាយុ២៦ឆ្នាំ ដែលត្រូវគេដឹកទៅព្យាបាលក្នុងពេទ្យឆ្កួតនោះ ជាអ្នកលួចដុត
អគ្គិភ័យបានឆាបឆេះនៅម៉ោង២ រំលងអធ្រាត្រ ឆ្លងចូលថ្ងៃ២៦មេសានេះ។ វាត្រូវពន្លត់ឲ្យរលត់ទៅ គឺលុះនៅម៉ោង ៤និង៤៨នាទី ជិតភ្លឺទៅហើយ។ អគារជាមន្ទីរពេទ្យដែលលេបត្របាក់ដោយអណ្តាតភ្លើង មានតែមួយជាន់ប៉ុណ្ណោះ។ ផ្ទៃក្រឡាដែលឆេះ សរុបទៅគឺ៤២០ ម៉ែត្រការ៉េ។
អគារនេះស្ថិតនៅទីប្រជុំជនឈ្មោះ Ramenskoy នៅចម្ងាយ៤៥គ.ម.ពាយព្យពីរដ្ឋធានីម៉ូស្គូ។
សម្រាប់ជាការយល់ដឹង ក្រុងរណបបែបនេះ ស្ថិតនៅក្នុងដែនដីជុំវិញរដ្ឋធានីម៉ូស្គូ ជាដែនដីនៃខេត្តក្រោមឈ្មោះថា “ខេត្តម៉ូស្គូ” មានអភិបាលខេត្តរបស់ខ្លួនផ្ទាល់។ អភិបាលខេត្តនេះ លោក Andrei Vorobiev បានប្រកាសយកថ្ងៃសៅរ៍ស្អែកជាទិវាកាន់មរណទុក្ខ រំលឹកដល់វិញ្ញាណក្ខន្ធអ្នកស្រុកដែលអភ័ព្វស្លាប់ទៅនោះ និងប្រកាសផ្តល់ប្រាក់ឧបត្ថម្ភដល់គ្រួសារអ្នកស្លាប់ម្នាក់ៗ គឺ៥០ម៉ឺនរូប្ល រឺប្រមាណ ១ម៉ឺន៦ពាន់ដុល្លារអាមេរិក។
រីឯអ្នកធ្លាក់ខ្លួនស្លាប់ទៅ គឺ៣៦នាក់ ជាអ្នកជម្ងឺ ហើយ២នាក់ជាគ្រូពេទ្យព្យាបាលគេ។
មានជីវិតថ្លៃនៅរស់ គឺអ្នកជម្ងឺ២នាក់ និងស្ត្រីគិលានុបដ្ឋាយិកាម្នាក់ ដែលជាអ្នកសង្គ្រោះគេ។
ស្លាប់ច្រើនយ៉ាងនេះ តាមយោបល់សមត្ថកិច្ច គឺមកពីពេលអគ្គិភ័យឆាបឆេះ អ្នកជម្ងឺកំពុងដេកលង់លក់ ក្រោយពីគេបានផឹកថ្នាំសណ្តំសរសៃប្រសាទគេ និងមកពីបង្អួចអគារនោះ សុទ្ធតែបាំងទៅដោយចម្រឹងដែក ការពារកុំឲ្យពួកអ្នកជម្ងឺមានខួរក្បាលដើរមិនស្រួល អាចចេញទៅក្រៅឡើយ។ បើនិយាយពីឡានទឹកលត់ភ្លើងនោះ វាបានបើកទៅដល់កន្លែងអាសន្នអន់ក្រ លុះ១ម៉ោងក្រោយមក។
គណៈកម្មាធិការខាងស៊ើបអង្កេតបានលើកឡើងមូលហេតុ៣នៃអគ្គិភ័យនោះ គឺ៖
ទី១- អាចមកពីការធ្វេសប្រហែស បែបយ៉ាងភ្លេចពន្លត់កន្ទុយបារី ដែលជក់នៅសល់។
ទី២-ប្រហែលមកពីខ្សែនាំចរន្តអគ្គិសនីក្នុងអគារនោះ ស្ថិតក្នុងសភាពខូចទៅហើយ បណ្តាលឲ្យវាឆ្លងភ្លើង ខ្ទាតចេញជាផ្កាភ្លើង ដែលជាដើមហេតុនៃអគ្គិភ័យ ដ្បិតក្នុងអគារនោះ ទាំងក្តារក្រាល ទាំងពិដាន គឺសុទ្ធតែធ្វើពីឈើ។
ទី៣-គឺការលួចដុតឲ្យឆេះដោយចេតនា។ តឹកតាងបែបនេះ បង្ហាញដោយសាក្សីម្នាក់ដែលថា ការលួចដុតបែបនេះប្រព្រឹត្តិដោយបុរសម្នាក់អាយុ២៦ឆ្នាំ ដែលត្រូវគេដឹកទៅព្យាបាលក្នុងពេទ្យឆ្កួតនោះទាំងបង្ខំ។ គាត់បានលួចដុតឲ្យឆេះទៅ កៅអីទម្រេទ នៅក្នុងសាលសម្រាប់ពួកអ្នកជម្ងឺអង្គុយមើលទូរទស្សន៍៕ប្រភពពី (RFI)
