ស្នាមញញឹមរបស់សុគន្ធ និសា ដែលនាងថត បង្ហោះតាមប្រព័ន្ធអីុនធើរណេត ពីប្រទេសបារាំង បង្ហាញ ពីភាពរីករាយចេញពីក្រអៅបេះដូង។ អ្នកកៀកជិតនឹង រូបនាងប្រាប់ថា សេចក្តីសោមនស្សនេះ មិនមែនដោយ សារតែនាងបានដើរលេងពេញទ្វីបអឺរ៉ុប ប៉ុណ្ណោះទេ តែ ការត្រៀមខ្លួនរស់នៅក្នុងគេហដ្ឋានថ្មី ធ្វើឱ្យដួងចិត្តរបស់ នាង រីកស្រស់ដូចផ្កា។
ប្រភពដែលសុំមិនបញ្ចេញឈ្មោះរូបនោះ និយាយថា និសា សម្លឹងឃើញផ្ទះវីឡាដែលកំពុងសាងសង់នៅមិនឆ្ងាយ ប៉ុន្មានពីទីប្រជុំជនរាជធានីភ្នំពេញ និងមានទីធ្លាធំទូលាយ សម្រាប់ឱ្យនាងអង្គុយសម្រាកលំហែកាយ នាពេលទំនេរពី ការងារសិល្បៈ។ ដោយសុំមិនបញ្ជាក់ទីតាំង ប្រភពនោះ បន្តថា វីឡានោះមានតម្លៃចន្លោះពី ១៥ម៉ឺន ទៅ១៧ម៉ឺនដុល្លារ អាស្រ័យទៅតាមទំហំដី។
ប្រភពខាងលើឱ្យដឹងថា និសា នឹងធ្វើការ សម្រេចចិត្ត នៅពេលនាងវិលត្រឡប់ពីបារាំង នាពាក់កណ្តាលខែមេសា បន្ទាប់ពីដើរច្រៀង១ខែកន្លះ។ ក្នុងរយៈពេលដែលនាងមិនទាន់មានជម្រកផ្ទាល់ខ្លួន នាងទំនងជាត្រូវស្នាក់អាស្រ័យជាមួយនឹងបងប្អូន របស់នាង ដែលមានផ្ទះនៅម្តុំក្រោយព្រះបរមរាជវាំង និងផ្សារដីហុយ។ ជាយូរមកហើយ ដែលនិសា កួចចិត្តប៉ងប្រាថ្នាលើផ្ទះប្រណីត តែបំណងរបស់នាងទើបបានសម្រេច នៅពេលដែលផ្ទះល្វែងរបស់នាង ដែលសាងសង់រួមគ្នាជាមួយអតីតសង្សារ លោកសុខ ជំនោរ បានលក់ដាច់ ដោយជោគជ័យ កាលពីជិត១ខែមុន។ ផ្ទះល្វែងដែលជាទ្រនំសាងស្នេហ៍រវាងនាង និងសង្សារចាស់ ស្ថិតនៅ ក្បែរអាកាសយានដ្ឋានអន្តរជាតិភ្នំពេញ ត្រូវគេដឹងថា លក់បានតម្លៃប្រហែល៨ម៉ឺនដុល្លារ ដែលទើបបាន ពាក់កណ្តាលនៃតម្លៃផ្ទះថ្មីក្នុងក្តីស្រមៃរបស់នាងប៉ុណ្ណោះ។
យ៉ាងណាក៏ដោយ ការស្វែងរកប្រាក់បង្គ្រប់ទិញផ្ទះថ្មី ទំនងមិនមែនជាឧបសគ្គធំរបស់និសា ទេ។ នៅ ដើមឆ្នាំនេះ នាងបានចេញទៅសហរដ្ឋអាមេរិក រហូតដល់ទៅ៣ខែ ហើយនាពេលនេះ នាងកំពុងច្រៀងនៅ ប្រទេសបារាំង រយៈពេល១ខែកន្លះ ដែលបេសកកម្មទាំងពីរនេះ ត្រូវគេប៉ាន់ប្រមាណថា អាចឱ្យនាងរកចំណូល បានច្រើនក្រាស់ក្រែល។ នាងអាចបង់រំលស់សម្រាប់ទឹកប្រាក់ដែលនៅសល់។ លោកសុខ ជំនោរ អតីតគូស្នេហ៍ចាស់ដែលធ្លាប់ដឹកដៃនិសា ពុះពារឧបសគ្គស្នេហា អបអរនារីដែល លោកធ្លាប់ស្រលាញ់ពេញក្រអៅបេះដូង ចំពោះការបានសម្រេចបំណងប្រាថ្នា។
លោកនិយាយថា “គ្មានអ្នកណា ម្នាក់ អាចបំភ្លេចអតីតកាលបានទេ តែការចាកចេញពីផ្ទះនេះ អាចជួយឱ្យគាត់គេចពីរូបភាពអតីតកាល ហើយ នេះអាចជាការចាប់ផ្តើមរបស់គាត់”។ កាលទើបចែកផ្លូវគ្នាដើរ លោកជំនោរ ធ្លាប់បានស្នើសុំកុំឱ្យនិសា លក់ផ្ទះមួយខ្នង ដែលប្រកបដោយមនោសញ្ចោតនានេះ ត្បិតផ្ទះមួយខ្នងនេះ ពោរពេញដោយមនោសញ្ចេតនា និងមានការចូលរួមជ្រោមជ្រែងផ្នែកហិរញ្ញវត្ថុ ពីអ្នកស្រលាញ់គាំទ្រមួយចំនួន។
លោកជំនោរ លើកឡើងថា “ពេលនេះ ខ្ញុំគ្មានសិទ្ធិសូម្បីតែស្តាយ គឺ មានតែចូលរួមត្រេកអរនូវអ្វីដែលគាត់មាន”។
គួរកត់សម្គាល់ថា ៣ឆ្នាំចុងក្រោយនេះ ខ្សែជីវិតរបស់អ្នកចម្រៀងសុគន្ធ និសា បានប្រែប្រួលជាបន្តបន្ទាប់។ កាលពីឆ្នាំ២០១១ នាងបានផ្តាច់ចំណងស្នេហ៍កម្សត់ពី លោកជំនោរ បន្ទាប់ពីបានស្រលាញ់រួមរស់ជាមួយគ្នា អស់ពេល៨ឆ្នាំ។ ឆ្នាំ២០១២ នាងបានប្តូរទ្រនំច្រៀងពីផលិតកម្មរស្មីហង្សមាស ទៅផលិតកម្មថោន ហើយនៅឆ្នាំ២០១៣ នេះ នាងនឹងមានជម្រកថ្មីផ្ទាល់ខ្លួនទៀត។
អ្នកសិល្បៈ ខ្លះលើកឡើងថា មិនត្រឹមតែ ប្តូរផ្ទះប៉ុណ្ណោះទេ ម្ចាស់ស្នេហ៍ថ្មីរបស់នាង ក៏ប្រហែលជាចេញមុខនៅឆ្នាំនេះដែរ។ បន្ទាប់ពីបែកស្នេហ៍គ្រាដំបូង សុគន្ធ និសា ត្រូវឡោមព័ទ្ធដោយព័ត៌មានស្នេហា ជាមួយថៅកែចម្ការកៅស៊ូផង និងបុរសខ្មែរ រស់នៅអាមេរិក ផង។
និសា មិនទាន់ ឆ្លើយតបយ៉ាងណានៅឡើយទេ ទៅនឹងព័ត៌មាននេះ ក៏ប៉ុន្តែ គេសង្ស័យថា នាងទទួលបាន កម្លាំងចិត្តពិសេស ក្នុងការផ្លាស់ទ្រនំថ្មី នាពេលនេះ។
យ៉ាងណាក៏ដោយ មិត្តរួមអាជីពដែលពេញចិត្តនឹងភាពស្រគត់ស្រគំរបស់តារាស្រី រូបស្រស់នេះ សង្ឃឹមថា ផ្ទះថ្មីរបស់និសា នឹងក្លាយជាទ្រនំសាងស្នេហ៍សុភមង្គល មិនជួបរឿងព្រាត់ប្រាសដូចគ្រាមុន ៕ ប្រភព akt-media
