ក្រុងតូក្យូ : ក្រុមហ៊ុន Triumph ដ៏ល្បីល្បាញបានបង្កើតគំនិតអភិវឌ្ឍនូវអាវទ្រនាប់ស្រ្តីនាសម័យមុន ឲ្យមកក្លាយជាអាវទ្រនាប់ដ៏គួរឲ្យចាប់អារម្មណ៍មួយដោយវាមានរូប រាងដូចពែងទឹកហើយអាចដាំដំណាំស្រូវបានថែមទៀតផង។
ក្រុមហ៊ុនល្បីខាងផលិតអាវទ្រនាប់ម៉ូដចម្លែកៗមួយនេះ បានផលិតអាវទ្រនាប់រាងពែងទឹកទាំងគូដែលធ្វើពីជ័រប្លាស្ទិក។ ផ្នែកខាងក្នុងនៃអាវទ្រនាប់នេះគេអាចដាក់ដីនិងគ្រាប់ស្រូវ សម្រាប់ដាំដោយការស្រោចទឹកវាបានទៀតផង។
យោងតាមស្ថិតិថ្មីៗចុងក្រោយនេះបានឲ្យដឹងថា ប្រជាជនជប៉ុនកំពុងតែមានការបារម្ភខ្លាំងឡើងៗចំពោះបញ្ហាសុវត្ថិភាព នៃម្ហូបអាហារនិងបញ្ហាបរិស្ថាននិងមានក្តីប្រាថ្នាចង់បានខ្លាំង ចំពោះជីវភាពរស់នៅបែបទីជនបទ។ ដូច្នេះហើយ ទើបយើងឃើញការលក់ដូរឧបករណ៍កសិកម្មនានាតាមប្រព័ន្ធអ៊ីនធឺណិតក្ដី និងតាមបណ្ដាហាងនានាក្ដីកំពុងតែមានសន្ទុះគួរឲ្យកត់សម្គាល់នៅ ប្រទេសជប៉ុន។
ដូច្នេះក្រុមហ៊ុនTriumph អាចគិតបានថាវាជាគំនិតមួយដែលបង្ហាញឲ្យបានដឹងថាស្រ្តីនៅ ប្រទេសជប៉ុនមានចំណូលចិត្តខាងវិស័យកសិកម្មដាំដុះ។
តើលោកអ្នកពិតជាគិតថាវាមានអាវទ្រនាប់ប្រភេទនេះមែន?
ប្រសិនជាគិតថាមានមែននោះច្បាស់ជាខកបំណងហើយក្នុងការជាវវា តាមការឃោសនាលក់។ តាមពិតវាគ្រាន់តែជាគំនិតច្នៃប្រឌិតមួយដែលបង្ហាញពីទំនោរនិយម ផ្នែកកសិកម្មនៅប្រទសជប៉ុន ហើយជាក់ស្ដែងអាវទ្រនាប់បែបនេះ មិនត្រូវបានផលិតសម្រាប់ដាក់លក់លើទីផ្សារឡើយ៕ ប្រភពពី ភ្នំពេញប៉ុស្តិ៍
