ស្រវឹងខ្លាំង បើករថយន្ត បុកបង្គោលភ្លើង បាក់រៀប ដល់ដី

ភ្នំពេញ ៖ បុរសម្នាក់ ស្ថិតក្នុងភាពស្រវឹង បានបើករថយន្ត បុកបង្គោលសសរ ព្រំដី និងថូផ្កា រួចជ្រុលទៅបុក បង្គោលភ្លើងបាក់អស់ ១ ដើមធំ នៅចំណុច មុខភោជនីយដ្ឋាន ស្ថិតនៅផ្ទះលេខ ១៣១ ផ្លូវលេខ ១០៥ សង្កាត់បឹងកេងកងទី៣ ខណ្ឌចំការមន កាលពីវេលាម៉ោង ២ និង ៣០នាទីទាបភ្លឺ ថ្ងៃទី២៥ ខែមេសា ឆ្នាំ២០១៣ ។

អ្នកបើកបរ រថយន្តខាងលើនេះ មានឈ្មោះ នង វុទ្ធី អាយុប្រហែល ៣០ ឆ្នាំ បើករថយន្តម៉ាកឡង់គ្រីស័រ ពណ៌ស្ក ពាក់ស្លាកលេខភ្នំពេញ 2E-3919 ហើយត្រូវសមត្ថកិច្ច នគរបាលប៉ុស្តិ៍ឃាត់ខ្លួន នាំទៅកាន់ ស្នាក់ការប៉ុស្តិ៍រដ្ឋបាល បឹងកេងកងទី៣ ដើម្បីធ្វើការសាកសួរ ។ ប៉ុន្តែ បុរស នង វុទ្ធី មិននិយាយស្តីអ្វីទាំងអស់ ដោយសាររូបគាត់មានអាការៈស្រវឹងខ្លាំងពេក ។ ចំណែកឯនៅកន្លែងកើតហេតុ ឯណោះវិញ ម្ចាស់ផ្ទះរងគ្រោះ មានការខឹងសម្បាយ៉ាងខ្លាំង ចំពោះបុរស នង វុទ្ធី ដែលបើកបររថយន្ត បុកបំផ្លាញទ្រព្យសម្បត្តិមុខផ្ទះគាត់ ។

តាមប្រភពព័ត៌មាន នៅកន្លែងកើតហេតុ បានឲ្យដឹងថា មុនពេលជួបគ្រោះថ្នាក់ រថយន្តបង្កបានបើកបរ តាមបណ្តោយផ្លូវលេខ ១០៥ ក្នុងទិសដៅពីត្បូង ទៅជើង លុះដល់ចំណុចខាងលើ ក៏ជ្រុលចង្កូតទៅបុករះ បាក់បង្គោលថ្មព្រំដីមួយដើមធំ រួចបុកថូផ្កាអស់ជាច្រើនថូ ហើយជ្រុលល្បឿន ទៅបុកបង្គោលដែករបស់ក្រុមហ៊ុនអគ្គិសនី បាក់អស់មួយដើមធំ ទើបរថយន្តបែកកង់មុខខាងឆ្វេងទៅមុខលែងរួច។

ក្រោយកើតហេតុ សមត្ថកិច្ច បានចុះវាស់វែង ដកហូតរថយន្តបង្កហេតុ និងនាំខ្លួនអ្នកបើកបរថយន្តទៅកាន់ ការិយាល័យនគរបាលចរាចរណ៍ផ្លូវគោក រាជធានីភ្នំពេញ ដើម្បីចាត់ការតាមច្បាប់ ៕ ដោយដើមអម្ពិល