សេចក្តីរាយការណ៍ ពីអ្នកដែលធ្វើដំណើរ ឆ្លងកាត់ផ្លូវជាតិលេខ៥ បានឲ្យដឹងថា រថយន្ត ជាច្រើនគ្រឿង ទាំងចូលមក រាជធានីភ្នំពេញ និងទាំងចេញពី រាជធានីភ្នំពេញ ឆ្ពោះទៅតាម បណ្តាខេត្ត បានកកស្ទះ ទៅមុខលែងរួច ចាប់ពីក្រុមហ៊ុន ផលិតមី ម៉ែនសារុន ទៅគីឡូម៉ែត្រលេខ៩ តាំងពីវេលាម៉ោង ៨៖០០ព្រឹក ថ្ងៃអាទិត្យ ទី៣១ ខែមីនា ឆ្នាំ២០១៣ មកម៉្លេះ ហើយរហូតមកដល់ រសៀលថ្ងៃដដែលនេះ ការកក ស្ទះចរាចរណ៍ ហាក់មិនទាន់ធូរស្រាល នៅឡើយទេ។
បើតាមអ្នកធ្វើដំណើរ ដែលកកស្ទះចរាចរណ៍ ខាងលើនេះ បានឲ្យដឹងថា ទំនងថ្ងៃនេះ ជាថ្ងៃសែនផ្នូរ ដែលម្នាក់ៗ ហៅថា ថ្ងៃឆេងម៉េង របស់បងប្អូនខ្មែរកាត់ចិន បានធ្វើដំណើរទៅ តាមបណ្តាខេត្ត និងសម្រុកទៅតាមផ្លូវ ជាតិលេខ៥នេះ។
ម្យ៉ាងវិញទៀត អ្នករត់រថយន្ត ឈ្នួល ទៅខេត្តកំពង់ចាម និងខេត្តកំពង់ធំ ជាដើម ក៏បានធ្វើដំណើរ តាមផ្លូវនេះដែរ ហើយបត់ឡើង ស្ពានព្រែកក្តាម ឆ្ពោះទៅតាមផ្លូវ លេខ៦អាវិញ ដែលជាហេតុនាំឲ្យ មានការកកស្ទះ ចរាចរណ៍បែបនេះ៕
ដោយ៖ ដើមអម្ពិល
