រាជធានីភ្នំពេញ ៖ សមត្ថកិច្ចចម្រុះ បានចុះប្រតិបត្ដិការឡោមព័ទ្ធផ្ទះមេខ្លោងប្លន់ប្រដាប់អាវុធយ៉ាង សកម្មនៅក្នុងរាជធានីភ្នំពេញ កាលពីយប់ថ្ងៃទី២៩ ខែមីនា ឆ្នាំ២០១៣ វេលាម៉ោង១០និង៣០នាទីយប់ ឋិតនៅតាមបណ្ដោយផ្លូវកម្ពុជាក្រោម ទល់មុខសណ្ឋាគារលីឡាយ ក្នុងសង្កាត់ មិត្ដភាព ខណ្ឌ៧មករា ឃាត់ខ្លួនបានបុរសម្នាក់ រួមនឹងស្រីស្នេហ៍ ដកហូតប្រាក់ចំនួន២.១០២ដុល្លារ អាវុធខ្លី១ដើម ម៉ាកCZ គ្មានគ្រាប់ ។
សមត្ថកិច្ចបាននាំជនសង្ស័យ មកកាន់ការិយាល័យព្រហ្មទណ្ឌកម្រិតធ្ងន់រាជធានីភ្នំពេញ ដើម្បីសាកសួរ និងកសាងសំណុំរឿងចាត់ការបន្ដ ។ សមត្ថកិច្ចបានឱ្យដឹងថា បន្ទាប់ពីមានសកម្មភាពប្លន់ប្រដាប់អាវុធ ដែលតែងតែឡើងជាញឹកញាប់មួយរយៈ កន្លងមកនេះ កម្លាំងនគរបាលបានធ្វើការស្រាវជ្រាវ និងកំណត់មុខសញ្ញា ដែលធ្លាប់ធ្វើសកម្មភាពប្លន់ពីមុន និងទើបតែចេញមកពីពន្ធនាគារថ្មីៗនេះ រហូតឈានដល់ឃាត់ខ្លួនបានជនល្មើសបាន៤នាក់ហើយ ដូចជានៅខេត្ដកំពង់ស្ពឺបានម្នាក់, ខណ្ឌឫស្សីកែវ បានម្នាក់, ខណ្ឌដូនពេញបានម្នាក់ និងខណ្ឌ៧មករាបានម្នាក់ និងធ្វើការស្រាវជ្រាវស្វែងរកបក្ខពួកបន្ដទៀត ៕
