លោក យឹម សារ៉ាន់ អធិការខណ្ឌដង្កោបានឲ្យដឹងថា ជនសង្ស័យប្រើប្រាស់គ្រឿងញៀនទាំងបីនាក់ ដែលត្រូវឃាត់ខ្លួនទី១ឈ្មោះ អ៊ួន សុភាព (ហៅ យុទ្ធ)ភេទប្រុស អាយុ២៤ឆ្នាំ ស្នាក់នៅភូមិចា ឃុំរវាង ស្រុកសំរោង ខេត្តតាកែវ ទី២ឈ្មោះ ម៉ុន សេងហួ ភេទប្រុស អាយុ ១៧ឆ្នាំជាសិស្សថ្នាក់ទី១១វិទ្យាល័យស្លារង ស្នាក់នៅក្នុងភូមិថ្មី ឃុំរវាង ស្រុកសំរោង ខេត្តតាកែវ និងទី៣ឈ្មោះ គឹម សំណាង ភេទប្រុស អាយុ១៦ឆ្នាំ ជាសិស្សថ្នាក់ទី១១វិទ្យាល័យស្លារង ស្នាក់នៅក្នុងភូមិថ្លា ឃុំរវាង ស្រុកសំរោង ខេត្តតាកែវ ។
លោកអធិការខណ្ឌបញ្ជាក់ថា មុនពេលឃាត់ខ្លួនជនសង្ស័យខាងលើនេះ លោកបានដឹកនាំ កម្លាំងចុះល្បាត ក្នុងមូលដ្ឋាន ដើម្បីទប់ស្កាត់រាល់បទល្មើសផ្សេងៗកុំឲ្យកើតមានឡើង លុះមកដល់ចំណុចក្បែរផ្សារថ្នល់បត់ ស្ថិតក្នុងភូមិថ្មី សង្កាត់ដង្កោ ក៏ស្រាប់តែប្រទះឃើញជនសង្ស័យទាំងបីនាក់ខាងលើ ជិះម៉ូតូមួយគ្រឿង ម៉ាកគុបមូល ស៊េរីចាស់ដោយគ្មានស្លាកលេខជិះឌុបគ្នា ហើយដោយមានការសង្ស័យទើបកម្លាំងដែល កំពុងដើរល្បាតឃើញ ក៏ឃាត់ឲ្យយុវជនទាំងបីនាក់នោះ ឈប់ដើម្បីធ្វើការត្រួតពិនិត្យ ប៉ុន្តែពួកគេ មិនព្រមឈប់ តាមការហៅរបស់សមត្ថកិច្ចយើងឡើយ គឺពួកគេបានបន្ថែមល្បឿនម៉ូតូជិះទៅមុខរហូតឃាត់ខ្លួន បាននៅចំណុច ជិតវិទ្យាល័យទួលអំពិល ក៏ត្រូវសមត្ថកិច្ចឃាត់បាន ហើយធ្វើការឆែកឆេររកឃើញថ្នាំញៀនពណ៌សថ្លាមួយ កញ្ចប់នៅក្នុង កាបូបពណ៌ត្នោតរបស់ជនសង្ស័យ និងទឹកចំនួន៤ដប ទើបនាំខ្លួនរួមទាំងវត្ថុតាង មកកាន់អធិការដ្ឋានខណ្ឌដង្កោ ដើម្បីធ្វើការសាកសួរ ។
នៅចំពោះមុខសមត្ថកិច្ចជនសង្ស័យទាំងបីនាក់បានឆ្លើយសារភាពថា ខ្លួនទាំងបីនាក់ពិតជា បានទិញថ្នាំញៀនមួយកញ្ចប់យកមកប្រើប្រាស់ពិតប្រាកដមែន។ យោងតាមចម្លើយសារភាពរបស់ជនសង្ស័យ សមត្ថកិច្ច បានសម្រេច កសាងសំណុំរឿងបញ្ជូនខ្លួនពួកគេទៅសាលាដំបូងរាជធានីភ្នំពេញ ចាត់ការតាមនីតិវិធី៕
ដោយៈ ដើមអម្ពិល
