ឧបទ្វីបកូរ៉េ ៖ សារព័ត៌មាន KCNA របស់កូរ៉េខាង ជើងបានផ្សព្វផ្សាយថា កាលពីវេលាម៉ោង០០និង៣០នាទីរំលង អធ្រាត្រឈានចូលថ្ងៃទី២៩ខែមីនា មេដឹកនាំកូរ៉េខាងជើង គីម ជុងអ៊ុនបាន កោះប្រជុំ មន្ដ្រីយោធាជាន់ខ្ពស់ជាបន្ទាន់ និងបានចេញបញ្ជាឲ្យ កងពលកាំជ្រួចមីស៊ីលត្រៀមលក្ខណៈ វាយប្រហារទីតាំងនានារបស់អាមេរិក នៅទ្វីបអាស៊ី ។ ក្រៅពីទឹកដីអាមេរិក កាំជ្រួចមីស៊ីលកូរ៉េខាងជើងក៏ បានតម្រង់ទៅលើទីតាំងនានារបស់អាមេរិក នៅអាស៊ីប៉ាស៊ីហ្វិក ក្នុងនោះមានទាំងទីតាំងយោធានៅកោះ Hawaii និងកោះ Guam ។ ចំណែកកូរ៉េខាងត្បូងក៏ឋិតនៅក្នុងគោល ដៅកម្ទេចនៃកាំជ្រួចមីស៊ីលទាំងនោះផងដែរ ។
លោក គីម ជុងអ៊ុន បានចុះហត្ថលេខា លើបទបញ្ជាបញ្ជូនទៅកាន់កងពលកាំជ្រួចមីស៊ីលឱ្យត្រៀមលក្ខណៈ រួចជាស្រេច រង់ចាំបាញ់ប្រហារគ្រប់ពេលវេលាទៅ លើទីតាំងរបស់អាមេរិក ។ ការចេញបញ្ជាទាំងពាក់កណ្ដាល អធ្រាត្ររបស់មេដឹកនាំ គីម ជុងអ៊ុន បានធ្វើឡើងបន្ទាប់ពីអាមេរិកបញ្ជូនយន្ដហោះទម្លាក់គ្រាក់បំបាំងកាយ ប្រភេទB-2 មកកាន់កូរ៉េខាងត្បូង ដែលជាសញ្ញាប្រកាសអាសន្នព្រមានដល់កូរ៉េ ខាងជើង ក្រោយពេលមេដឹកនាំប្រទេស នេះបង្ហាញឥរិយាបថបទបង្កសង្គ្រាមជា មួយប្រទេសជិតខាង បន្ទាប់ពីសហគមន៍អន្ដរជាតិដាក់ទណ្ឌកម្មនោះ ។ មេដឹកនាំកូរ៉េខាងជើង គីម ជុងអ៊ុន ចាត់ទុកការធ្វើសមយុទ្ធរបស់អាមេរិក និងកូរ៉េខាងត្បូង ដែលមានការចូលរួមពីយន្ដហោះទម្លាក់គ្រាប់បែកB-2 ដែលជា ឱសានវាទរបស់ទីក្រុងវ៉ាស៊ីនតោន ក្នុងការធ្វើសង្គ្រាមបរមាណូនៅលើទឹកដី ឧបទ្វីបកូរ៉េ ក្នុងពេលណាមួយដ៏ខ្លីខាងមុខ។
មេដឹកនាំកូរ៉េ ខាងជើង គីម ជុងអ៊ុន បានប្រកាសតាមប្រព័ន្ធផ្សព្វផ្សាយ KCNA ថា ការ ដែលអាមេរិកបញ្ជូនយន្ដហោះទម្លាក់ គ្រាប់បំបាំងកាយB-2 មកកាន់ឧបទ្វីបកូរ៉េ ជាសកម្មភាព “ប្រថុយប្រថានហួសព្រំដែន” ។ មេដឹកនាំកូរ៉េខាងជើងបានប្រកាស ថា កម្លាំងទាហានប្រទេសនេះនឹងតបត យ៉ាងស័ក្ដិសមបំផុតនូវការដាក់គំរាប វាយប្រហារបរិមាណូរបស់អាមេរិក ដោយកូរ៉េខាងជើងនឹងតបតវិញដោយ បរមាណូគ្មានការអាណិតអាសូរ ។ រឿងហេតុដែលមេដឹកនាំកូរ៉េខាងជើងកោះ ប្រជុំពាក់កណ្ដាលអធ្រាត្រចេញបញ្ជាឱ្យ កងពលកាំជ្រួចមីស៊ីលត្រៀមលក្ខណៈជា សកម្មភាពខុសប្រក្រតី ដោយកូរ៉េខាងជើងយល់ថា ខ្លួនកំពុងតែរងការគំរាម កំហែងដោយពិតប្រាកដ ពេលអាមេរិកបញ្ជូនយន្ដហោះចម្បាំងB-2 មកកាន់កូរ៉េ ខាងត្បូង ។
យន្ដហោះចម្បាំង២គ្រឿង បានហោះចេញពីទីតាំងទ័ពអាកាសរដ្ឋ Missouri តាំងពីថ្ងៃពុធកន្លងមក ហើយ បានមកដល់កូរ៉េខាងត្បូងនៅព្រហស្បតិ៍ ទី២៨ខែមីនា ក្រោយធ្វើដំណើរចម្ងាយ ផ្លូវជាង១ម៉ឺនគីឡូម៉ែត្រ ។ យន្ដហោះB-2 បំពាក់គ្រាប់មីស៊ីលនាំផ្លូវដែលមានទម្ងន់ ជាង២៣តោន ហើយចូលលុកលុយនៅ លើដែនអាកាសគូសត្រូវទម្លាក់គ្រាប់មីស៊ីល គ្រាប់បែក ដោយប្រព័ន្ធរ៉ាដា របស់សត្រូវមិនអាចចាប់បាននោះឡើយ។ យន្ដហោះ B-2 មកកាន់កូរ៉េខាងត្បូង គឺជាការគំរាមកំហែង “ព្រឺឆ្អឹងខ្នង”របស់ អាមេរិកទៅលើកូរ៉េខាងជើង ។ ក្រុមអ្នក វិភាគយល់ឃើញថា សកម្មភាពខាងលើ របស់ទីក្រុងវ៉ាស៊ីនតោនមានភាពខុស ប្រក្រតីមិនធ្លាប់មានពីមុនមក ។ សកម្ម ភាពខាងលើធ្វើឡើងក្រោយពេលអាមេរិក និងកូរ៉េខាងត្បូងបានព្រមព្រៀងគ្នាអាច បើកការវាយប្រហារកូរ៉េខាងជើងដោយ ឯករាជ្យមិនចាំបាច់ឱ្យកូរ៉េខាងជើងវាយ ប្រហារមុន ឬក៏ពេលកូរ៉េខាងត្បូងរងការ វាយប្រហារ ទើបអាមេរិកជួយ៕
