រាជធានីភ្នំពេញ ៖ នៅថ្ងៃទី០១ ខែមេសា ឆ្នាំ២០១៣ គឺ ជាថ្ងៃកុហក របស់អឺរ៉ុប បានធ្វើអោយប្រជាពលរដ្ឋ ទូទាំងពិភពលោក មានការភ្ញាក់ផ្អើលយ៉ាងខ្លាំង ជាមួយនឹងព័ត៌មានកុហកដ៏អស្ចារ្យមួយចំនួន ហើយបានធ្វើអោយមនុស្សជាច្រើន ស្ទើរលោះព្រលឹងជាមួយព័ត៌មានកុហកទាំងនោះ ផងដែរ ហើយព័ត៌មានទាក់ទិនការស្លាប់របស់លោក ថាក់ស៊ីន ស៊ីណាវ៉ាត្រា ដោយសារគ្រោះថ្នាក់ចរាចរនៅក្រុងឌុយបៃ ក៏កើតឡើងចំថ្ងៃកុហកនេះផងដែរ ។
ព័ត៌មានស្តីពីការគ្រោះថ្នាក់ចរាចរណ៍ រហូតដល់ស្លាប់របស់លោក ថាក់ ស៊ីន អតីតនាយករដ្ឋមន្ត្រីថៃ នៅទីក្រុងឌូបៃ នៃប្រទេសអារ៉ាប់រួម បានធ្វើអោយ ប្រជាពលរដ្ឋនៅក្នុងប្រទេសថៃ មានការភ្ញាក់ផ្អើលយ៉ាងខ្លាំង ដោយប្រព័ន្ធផ្សព្វផ្សាយបានសរសេរថា អ្នកបើកបររថយន្តរបស់លោក ថាក់ ស៊ីន បានបើកដឹកលោក នៅតាមបណ្តោយមួយកន្លែងនៅទីក្រុងឌូបៃ ដោយខ្វះការប្រុងប្រយ័ត្ន ក៏ជួបប្រទះនឹងគ្រោះថ្នាក់ចរាចរណ៍ ហើយបណ្តាលអោយលោក ថាក់ស៊ីន ស្លាប់នៅពេលបញ្ជូនដល់មន្ទីរពេទ្យ ។
យ៉ាងណាក៏ដោយលោក ថាក់ ស៊ីន បានបកស្រាយបំភ្លឺថា រហូតដល់ថ្ងៃទី ១ ខែមេសា ឆ្នាំ២០១៣ នេះគាត់មានភាពសុខសប្បាយជាធម្មតាទេ ហើយលោកក៏បានទទួលការហៅទូរស័ព្ទពីសាច់ញាតិ នៅក្រុងបាងកកមួយចំនួនដែលបានភ្ញាក់ផ្អើលចំពោះ ព័ត៌មាននៃការស្លាប់របស់ លោកចំថ្ងៃកុហក របស់អឺរ៉ុប ។ លោក ថាក់ ស៊ីន អាចមានអាយុកាន់តែវែង និងមានឈ្មោះកាន់តែល្បីល្បាញ នៅពេលមានការចុះផ្សាយថា លោកបានស្លាប់ នៅក្រុងឌុយបៃ នៅក្នុងថ្ងៃកុហករបស់អឺរ៉ុប ៕
