ខេត្ដព្រះសីហនុ ៖ រថយន្តក្រុមល្បាតតាមផ្លូវជាតិលេខ៤របស់ក្រុមហ៊ុន AZ បានក្រឡាប់ធ្លាក់ជ្រោះស្លាប់កងរាជអាវុធហត្ថលើផ្ទៃប្រទេស ម្នាក់ និងរបួសធ្ងន់ស្រាល៣នាក់ កាលពីវេលាម៉ោង ២រសៀលថ្ងៃទី១ ខែមេសា ឆ្នាំ ២០១៣នេះ នៅតាមបណ្ដោយផ្លូវជាតិលេខ៤ ត្រង់ចំណុចចំណោតអូរត្រាវព្រំសីមា ស្រុកព្រៃនប់និងក្រុងព្រះសីហនុ ទីដែលធ្លាប់មានមនុស្សស្លាប់ចំនួន១៨នាក់។
អ្នកកាសែតច្រើននាក់មិនត្រូវបាន គេអនុញ្ញាតឱ្យថតនិងផ្ដិតយករូបភាព នៅកន្លែងកើតហេតុនោះ ដោយពួកគេនិយាយបែបគម្រោះគម្រើយនិងកាន់អាវុធច្រងេងច្រងាងទៀតផង ។ តែទោះជាយ៉ាងនេះក្ដី គេដឹងថារថយន្ដដែលក្រឡាប់នោះម៉ាកហ្វដ ពណ៌ស ពាក់ស្លាកលេខ ភ្នំពេញ 2U-9816 និងឃើញមានមន្ដ្រីកងរាជអាវុធ ហត្ថលើផ្ទៃប្រទេសម្នាក់ដែលជិះរថយន្ដ ជាមួយគ្នានោះបានស្លាប់នៅនឹងកន្លែង ។ រីឯមនុស្ស៣នាក់ទៀតបានរងរបួសធ្ងន់ស្រាល បនញតាប់ពីរថយន្តនោះ ធ្លាក់ចូលទៅជ្រោះអូរត្រាវ ។
ជនរងគ្រោះដែលស្លាប់មានឈ្មោះ សឿន សុផល អាយុ៣០ឆ្នាំ ជាមន្ដ្រីកងរាជអាវុធហត្ថប្រចាំការនៅក្នុងក្រុមហ៊ុន AZ ដែលមានភារកិច្ចឃ្លាំមើលរថយន្ដដែល ធ្វើដំណើរឆ្លងកាត់ផ្លូវជាតិលេខ៤ ។ រីឯអ្នកបើកបរមិនទាន់ដឹងឈ្មោះនៅឡើយ គ្រាន់តែដឹងថាគាត់កំពុងស្ថិតនៅក្នុង សភាពស្រវឹង ដែលមានកម្រិតជាតិអាល់កុលរហូតដល់០,៦០ក្នុង១លីត្រខ្យល់ ។ បើតាមសមត្ថកិច្ចនគរបាល ចរាចរអះអាងថា កម្រិតអាល់កុលនេះ គឺបង្ហាញឱ្យដឹងថា អ្នកបើកបរស្ថិតក្នុងសភាពស្រវឹងខ្លាំង៕
