LG បញ្ចេញ​លក់​ទូរទស្សន៍​អេក្រង់​ស្តើង​ OLED មុន​គូ​ប្រជែង

ទូរទស្សន៍​ដ៏​ទំនើប ដែល​បំពាក់​អេក្រង់ OLED ផ្តល់​ពន្លឺ​រូបភាព​ភ្លឺ​ច្បាស់​បំផុត ត្រូវ​ក្រុមហ៊ុន LG បាន ​​ប្រកាស​ដាក់​លក់​នៅ​លើ​ទីផ្សារ​ហើយ ខណៈ​ក្រុមហ៊ុន​ជា Samsung គ្រោង​បញ្ចេញ​លក់​ទូរទស្សន៍​ដ៏​ទំនើប​របស់​ខ្លួន​ដែរ​ នៅ​ចុង​ឆ្នាំ​នេះ។

OLED TVs របស់ LG មាន​កម្រាស់​ស្តើង និង​ប្រើប្រាស់​ថាមពល​តិច​ជាង​ទូរទស្សន៍​កម្រាស់​ស្តើង​ធម្មតា​របស់​ក្រុមហ៊ុន​ដទៃ​ទៀត ដល់​ទៅ ២០ ភាគរយ។
បើ ​តាម​ការ​ឲ្យ​ដឹង​ពី​ក្រុមហ៊ុន​មួយ​នេះ​ថា ការ​បញ្ចេញ​លក់​ទូរទស្សន៍​ដ៏​ទំនើប​នេះ គឺ​ដើម្បី​ប្រកួត​ប្រជែង​ទីផ្សារ ជាពិសេស​ផលិតផល​ទូរទស្សន៍​របស់ Samsung។

OLED TVs មាន​ទំហំ ៥១អ៊ីញ ជាមួយ​កម្រាស់​តែ ០,១៦​អ៊ីញ​ប៉ុណ្ណោះ។ LG ចាប់​ផ្តើម​លក់​ទូរទស្សន៍​ដ៏​ទំនើប​នេះ នៅ​លើ​ទីផ្សារ​អាមេរិក​ខាង​ជើង, អឺរ៉ុប និង​អាស៊ី​នៅ​ត្រី​មាស​ទី​មួយ​នេះ ដោយ​ដាក់​តម្លៃ​លក់ ១១ លាន​វ៉ុន ឬ​ប្រហែល ១០,៣៥៧ ដុល្លារ​អាមេរិក។
Samsung បាន​ប្រកាស​ថា នឹង​បញ្ចេញ​លក់​ទូរទស្សន៍​អេក្រង់ OLED ដ៏​ទំនើប​របស់​ខ្លួន​នៅ​ចុង​ឆ្នាំ​នេះ។ កន្លង​ទៅ Samsung ក៏​ធ្លាប់​ប្រើប្រាស់​បច្ចេកវិទ្យា​អេក្រង់ OLED បំពាក់​ទៅ​លើ​ទូរសព្ទ​ស៊េរី​ទំនើប Galaxy S និង Note ​របស់​ខ្លួន​ផង​ដែរ។
ប្រភព៖ Channelnewsasia