រាជធានីភ្នំពេញ ៖ កាលពីរាត្រីថ្ងៃសុក្រ ទី២៩ មីនាកន្លងទៅ នៅលើសង្វៀនបាយ័នបឹងស្នោប្រមូលផ្តុំដោយកីឡាករ-កីឡាការិនីចំនួន៦ គូឡើងមកសម្តែងឫទ្ធិដាក់គ្នាជូនទស្សនិកជនបានទស្សនាមិនឱ្យខក បំណងឡើយ ។ ក្នុងចំណោមកីឡាករជើងខ្លាំងទាំង៦គូនោះ គេចាប់អារម្មណ៍ខ្លាំងជាងគេលើគូកីឡាករ សេង ហៀង មកពីក្លិបយុវជនកម្ពុជាមានជ័យ ប្រកួតជាមួយកីឡាករ ផៃ គឹមហឿត មកពីក្លិបខេមរិន្ទមានឫទ្ធិ ដោយសារតែ សេង ហៀង ធ្លាប់ទទួលការពិន័យមិនឱ្យឡើងរេញបាយ័នរឿងប្រកួតធ្លាក់ដៃ ដូច្នេះបើចាញ់ទៀតមិនដឹងជាយកមុខទៅទុកឯណាទេ ។ សំណាងល្អឆ្លងកាត់ការប្រកួតយ៉ាងស្វិតស្វាញចំនួន៥ទឹកពេញ សេង ហៀង ទទួលបានជ័យជម្នះដោយពិន្ទុទាំងមិនសូវស្រួលខ្លួនប៉ុន្មាន ។
មុនពេលឡើងរេញប្រកួត កីឡាករខ្លួនតូចចិត្តធំ សេង ហៀង ត្រូវបានគ្រូបង្វឹក និងអ្នករៀបចំកម្មវិធីប្រដាល់ប្រចាំស្ថានីយទូរទស្សន៍បាយ័នព្រមាន សាជាថ្មីនៅចំពោះមុខថា នេះជាលើកចុងក្រោយ បើវាយដូចក្មេងលេងទៀតនោះ គឺលែងយោគយល់ទៀតហើយ ច្បាស់ជាអស់ផ្លូវរកស៊ីជាមួយបាយ័នមិនខាន ។ ការព្រមាននេះកើតឡើងដោយសារតែ សេង ហៀង មួយរយៈកន្លងមកបណ្តោយឱ្យការប្រកួតរបស់ខ្លួនអន់ទៅៗស្ទើរតែមិនគួរ ឱ្យជឿ រហូតធ្វើឱ្យមហាជនអស់ជំនឿលែងចង់ឃើញមុខគេឡើងវាយទៀតផង ។ អុីចឹងហើយគ្រាន់តែការប្រកួតចាប់ផ្តើមភ្លាម គេឃើញកីឡាករ សេង ហៀង បញ្ចេញស្នៀតគុនវាយទៅលើកីឡាករ ផៃ គឹមហឿត ប្រាវៗតែម្តង តែក៏ទទួលការវាយបកពីដៃគូវិញដែរ ។ បន្ទាប់ពីវាយគ្នាបានមួយប្រាវមក ពួកគេអត់ហ៊ានស្ទុះចូលទៅវាយគ្នាឱ្យបានញឹកញាប់ទេ ម្នាក់ៗបានត្រឹមតែជន្លព្រោះមិនទាន់ដឹងវិជ្ជាគុនគ្នាខ្លាំង ដល់កម្រិតណា ដោយសារទើបតែជួបគ្នាលើកទី១ ។ នៅទឹកទី២ និងទី៣ សេង ហៀង ដែលបានក្លាយជាផ្ទាំងស៊ីបត្រូវគេតាមដានគ្រប់ជំហានប្រកួតនោះ បានខិតខំប្រើគ្រប់ល្បិចប្រកួតវាយសន្ធាប់ដាក់ដៃគូ មានត្រូវខ្លះ ខុសខ្លះ ពិសេសឱ្យតែគេចាប់ដៃគូបានគេច្រើនប្រើស្នៀតជង្គង់អុកយ៉ាង រន្ថើនមិនឱ្យរបូតចេញពីដៃខ្លួនឡើយ ។ ចំណែក ផៃ គឹមហឿត វិញបានវាយបកសងវិញមានទាំងជង្គង់ ម៉ាត់ និងទាត់ ប៉ុន្តែ មិនអាចធ្វើអ្វី សេង ហៀង បានឡើយព្រោះគេតែងគេចចេញទាន់ពេល ពេលទទួលរងការវាយប្រហារពីដៃគូម្តងៗ ។
ចូលដល់ទឹកទី៥ ជាទឹកចុងក្រោយ សេង ហៀង ដែលហាក់ដឹងពីចំណុចខ្សោយរបស់ដៃគូ គេគិតតែដើរចូលវាយ និងរកឱកាសចាប់ក្រៀក ឡើងជង្គង់រហូតទាល់តែ ផៃ គឹមហឿត អស់ខ្យល់និងត្រូវចាញ់ពិន្ទុគេទាល់តែបាន ។
សម្រាប់លទ្ធផលគូផ្សេងទៀត កីឡាករ ចាន់ ចំរើន មកពីក្លិបនិរោធមានជ័យ បានបំបាក់កីឡាករ វ៉ាន់ ចាន់រ៉ា មកពីក្លិបតាឡីដំរីមានឫទ្ធិ ឱ្យសន្លប់ក្នុងទឹកទី១ ។ កីឡាការិនី អេ យ៉ានុត មកពីក្លិបអេភូថតកីឡា ឈ្នះពិន្ទុកីឡាការិនី គង់ សារី មកពីក្លិបឃុំជ្រៃ ខេត្តបាត់ដំបង ។ កីឡាករ ឯម លឿងរ៉ា មកពីក្លិបគ្រុឌមានជ័យ ឈ្នះពិន្ទុកីឡាករ សុខ ចំរើនស្រ៊ុន មកពីក្លិបមជ្ឈមណ្ឌលសកម្មភាពកម្ចាត់មីនកម្ពុជា ។ កីឡាករ កែវ វិរៈ មកពីក្លិបគជសារកីឡា បានបំបាក់កីឡាករ យ៉ាម ពិសិដ្ឋ មកពីក្លិបរស្មីកុមារកំព្រាឱ្យសន្លប់នៅទឹកទី១ និងគូចុងក្រោយ កីឡាករ សៅ ប៊ុននឿន មកពីសមាគមកីឡាប្រដាល់ក្រសួងមហាផ្ទៃ ឈ្នះពិន្ទុកីឡាករ សរ សី មកពីសមាគមកីឡាប្រដាល់ក្រសួងការពារជាតិ ៕
