ស្ត្រីកែភេទជាបុរស ថូម៉ាស ប៊ីទី ពេលមានផ្ទៃពោះ
ក្រុង ហ្វូនិក : បុរសដែលធ្វើឲ្យផ្អើល ពិភពលោក ដោយសារតែការពពោះបង្កើតបានកូន៣នាក់នោះឥឡូវស្រាប់តែដាក់ពាក្យ សុំលែងលះភរិយារៀបការជាង១០ឆ្នាំ នៅតុលាការរដ្ឋអារីហ្សូណា សហរដ្ឋអាមេរិក។ ប៉ុន្តែបណ្ដឹងនេះត្រូវតុលាការច្រានចោល ដោយសារតែរដ្ឋអារីហ្សូណាមិនអនុម័តច្បាប់មង្គលការកែភេទ ឬភេទដូចគ្នា។
លោក ថូម៉ាស ប៊ីទី អាយុ៣៩ឆ្នាំ មានដើមកំណើតកើតជាស្ត្រី ប៉ុន្តែលោកបានធ្វើការវះកាត់ប្ដូរភេទនៅវ័យ២០ឆ្នាំ ដោយចាក់អ័រម៉ូនបុរស កាត់សុដន់ទាំងទ្វេចេញ និងប្ដូរឈ្មោះជាបុរសតាមផ្លូវច្បាប់ ប៉ុន្តែលោកមិនបានកាត់ស្បូន និងប្រដាប់បន្តពូជដែលជាកេរដំណែលម្ដាយចែកឲ្យនោះទេ។
លោកបានរៀបការ ជាមួយនាង ណានី នៅកោះហាវ៉ៃកាលពីឆ្នាំ២០០៣ ហើយលោកក៏បានចាក់មេជីវិតបុរសចូលក្នុងខ្លួន ដើម្បីបង្កកំណើត រហូតដល់ពពោះបង្កើតបានកូន៣នាក់។
ប៉ុន្តែនៅពេលដែលលោក ថូម៉ាស ប៊ីទី ដាក់ពាក្យលែងលះកាលពីឆ្នាំមុន ដើម្បីដោះដៃពីភរិយាទៅរៀបការជាមួយមិត្តស្រីថ្មីនោះ ស្រាប់តែតុលាការរដ្ឋអារីហ្សូណា ច្រានចោលបណ្ដឹងនោះ ដោយសារតែតាមផ្លូវច្បាប់ លោក ថូម៉ាស ប៊ីទី មិនមែនជាបុរសទេ កាលដែលលោកជ្រើសរើសរៀបការនៅឆ្នាំ២០០៣ជាមួយភរិយានោះ។
ដោយសារតែរដ្ឋអារីហ្សូណាមិនទទួលស្គាល់មង្គលការភេទដូចគ្នា តុលាការមិនអាចសម្រេចការលែងលះតាមផ្លូវច្បាប់បាន។ ទោះជាយ៉ាងណា តុលាការកាលពីថ្ងៃសុក្របានព្រមព្រៀងធ្វើការចែកទ្រព្យសម្បត្តិ និងការទទួលខុសត្រូវលើកូនរវាងប្ដីប្រពន្ធទាំងពីរ ប៉ុន្តែលោក ថូម៉ាស ប៊ីទី នៅតែទាមទារឲ្យចៅក្រមជួយឲ្យការលែងលះនេះចប់ស្រេចបាច់ឲ្យខាង តែបាន៕ប្រភពពី ភ្នំពេញប៉ុស្តិ៍
