គ.ជ.ប ឆ្លើយតបការធ្វើសវនកម្មបញ្ជីឈ្មោះអ្នកបោះឆ្នោត ការរកឃើញថាអ្នកបោះឆ្នោត1,25លាននាក់គ្មានឈ្មោះគឺមិនពិត
រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានមានប្រតិកម្មចំពោះរបាយការណ៍ចុងក្រោយរបស់អង្គការខុមហ្វ្រែល ស្តីពី «ការអង្កេតស្រាវជ្រាវបញ្ជីបោះឆ្នោត ការចុះឈ្មោះបោះឆ្នោត និងសវនកម្មបញ្ជីបោះឆ្នោតបន្ថែម ការផ្ទៀងផ្ទាត់ លុបឈ្មោះអ្នកបោះឆ្នោត សម្រាប់ការបោះឆ្នោតជ្រើសតាំងតំណាងរាស្ត្រឆ្នាំ២០១៣» ។
យោងតាមសេចក្តីប្រកាសព័ត៌មានរបស់អគ្គ លេខាធិការដ្ឋាន គ.ជ.ប ចុះថ្ងៃទី៥ ខែមេសា ឆ្នាំ២០១៣ ឱ្យដឹងថា តាមរបាយការណ៍នេះបានវាយតម្លៃថា ជាទូទៅបញ្ជីឈ្មោះបោះឆ្នោតឆ្នាំ២០១២ មានភាពល្អប្រសើរធៀបនឹងបញ្ជីឈ្មោះបោះឆ្នោតឆ្នាំ២០១១ និងបញ្ជីឈ្មោះបោះឆ្នោតឆ្នាំ២០០៨ ។ ក្នុងសេចក្តីប្រកាសព័ត៌មាន គ.ជ.ប បានថ្លែងអំណរគុណ និងកោតសរសើរអង្គការខុមហ្វ្រែល ដែលខិតខំចូលរួមតាមដានសកម្មភាពនៃដំណើរការរៀបចំការបោះឆ្នោត ។
សេចក្តីប្រកាសព័ត៌មានរបស់ គ.ជ.ប បានបំភ្លឺចំណុចមួយចំនួនដែលខុមហ្វ្រែលបានលើកឡើងក្នុងរបាយការណ៍ សវនកម្មជូនសាធារណជនថា ៖
ទី១-ការយកស្ថិតិប្រជាពលរដ្ឋអាយុ១៨ឆ្នាំឡើងពី ក្រសួងផែនការ វាមិនត្រូវគ្នានឹងស្ថិតិរបស់ គ.ជ.ប ទេ ពីព្រោះស្ថិតិរបស់ក្រសួងផែនការឈរលើការធ្វើជំរឿនប្រជាពលរដ្ឋ ឆ្នាំ២០០៨ ដែលអត្រាកំណើនតាមរូបមន្តជារៀងរាល់ឆ្នាំដោយមិនគិតដល់ថ្ងៃបោះ ឆ្នោតទេ ។ រីឯស្ថិតិរបស់ គ.ជ.ប គឺស្រង់ជាក់ស្តែងពីឃុំ សង្កាត់ដែលប្រជាពលរដ្ឋមានអាយុ១៨ឆ្នាំឡើងទៅគិតត្រឹមថ្ងៃបោះ ឆ្នោត ។
ទី២-បញ្ជីបោះឆ្នោតដែលឃុំ សង្កាត់បានធ្វើបច្ចុប្បន្នភាពហើយ និងបញ្ជីឈ្មោះបោះឆ្នោតថតចម្លងផ្ញើមក គ.ជ.ប មានទិន្នន័យដូចគ្នា ។ បើប្រៀបធៀបនឹងបញ្ជីបោះឆ្នោតដែលបានបិទផ្សាយនៅឃុំ សង្កាត់ និងបញ្ជីបោះឆ្នោតដែលបានបញ្ចូលទិន្នន័យទ្វេដងដោយមជ្ឈមណ្ឌល កុំព្យូទ័រ ដើម្បីផ្តល់សុពលភាពបញ្ជីឈ្មោះជាផ្លូវការនោះ វាអាចមិនមានចំនួនដូចគ្នាទាំងស្រុងនោះទេ ដោយហេតុថា គ.ជ.ប ពិនិត្យផ្ទៀងផ្ទាត់តាមទម្រង់១០១៦ និងទម្រង់១០១៧ ហើយអាចលុបឈ្មោះអ្នកបោះឆ្នោតចេញពីបញ្ជីបោះឆ្នោត លុះត្រាតែតាមការសម្រេចរបស់បណ្តឹងនៅថ្នាក់ គ.ជ.ប ឬថ្នាក់ក្រុមប្រឹក្សាធម្មនុញ្ញ ។ ក្រោយពី គ.ជ.ប បានផ្តល់សុពលភាពហើយ គ.ជ.ប បញ្ជូនបញ្ជីបោះឆ្នោតជាផ្លូវការទៅរក្សាទុកនៅឃុំ សង្កាត់ និងបញ្ជីបោះឆ្នោតផ្លូវការដែលត្រូវប្រើក្នុងការបោះឆ្នោតឆ្នាំ ២០១៣ គឺជាបញ្ជីបោះឆ្នោតតែមួយ ។
ទី៣-ចំពោះឈ្មោះស្ទួនដែលខុមហ្វ្រែលរកឃើញនៅ ក្នុងបញ្ជីបោះឆ្នោតឆ្នាំ២០១១ ហើយថា គ.ជ.ប លុបមិនអស់នោះ ដោយសារថា គ.ជ.ប អាចលុបឈ្មោះណាដែលមានទិន្នន័យដូចគ្នាទាំងស្រុង ហើយចំពោះឈ្មោះស្ទួនដែលមានទិន្នន័យមិនដូចគ្នាទាំងស្រុងនោះ គ.ជ.ប មិនអាចលុបបានទេ ពីព្រោះវាអាចច្រឡំនាំឱ្យបាត់បង់សិទ្ធិអ្នកបោះឆ្នោត ។
ទី៤-ការយកទម្រង់១០២៥ ទៅផ្ទៀងផ្ទាត់ឈ្មោះដែលលុបចេញពីបញ្ជីឈ្មោះបោះឆ្នោត គឺមិនត្រឹមត្រូវទេ ព្រោះទម្រង់១០២៥ គ្រាន់តែជាឈ្មោះដែលស្មៀនឃុំ សង្កាត់ភ្ជាប់ជាមួយឯកសារភស្តុតាងសម្រាប់ឱ្យក្រុមប្រឹក្សាឃុំ សង្កាត់សម្រេចលុបឬមិនលុបតែប៉ុណ្ណោះ ។ ការលុបជាក់ស្តែងគឺផ្អែកទៅលើទម្រង់១០១៦ និងទម្រង់១០១៧ ។
ទី៥-ករណីដែលបានរកឃើញថា មានតែ១៣,៥% ដែលបានចុះឈ្មោះបោះឆ្នោតហើយរកឈ្មោះមិនឃើញ វាគ្រាន់តែជាចំនួនភាគរយដែលទទួលបានពីប្រជាពលរដ្ឋមួយចំនួនឆ្លើយ តាមការសម្ភាសន៍ ។ ប៉ុន្តែមិនបានបញ្ជាក់ព័ត៌មានច្បាស់លាស់ថាគាត់បានចុះនៅឆ្នាំណា ហើយត្រូវបានលុបឈ្មោះនៅឆ្នាំណានោះទេ ។ ម្យ៉ាងទៀត ការធ្វើបច្ចុប្បន្នភាពលើបញ្ជីឈ្មោះបោះឆ្នោតក្នុងឆ្នាំ២០១២ គ.ជ.ប បានលុបឈ្មោះអ្នកស្លាប់ អ្នកផ្លាស់ទីលំនៅចេញ និងឈ្មោះស្ទូនចំនួន៤៦៨.៤៨៥នាក់ប៉ុណ្ណោះ ។ ដូចនេះខុមហ្វ្រែលបានរកឃើញថា ឈ្មោះប្រជាពលរដ្ឋដែលបានចុះឈ្មោះបោះឆ្នោត ហើយគ្មានឈ្មោះក្នុងបញ្ជីបោះឆ្នោត១៣,៥% ស្មើនឹង១,២៥លាននាក់នោះ គឺមិនពិតឡើយ ៕កោះសន្តិភាព
