ខេត្តព្រះសីហនុ ៖ មន្ត្រី អង្គភាពរដ្ឋាករទឹកខេត្តព្រះសីហនុបាននិយាយថា ចាប់ពីថ្ងៃទី ៣០ខែមិនា ឆ្នាំ២០១៣ នេះតទៅ ការផ្គត់ផ្គង់ទឹកសាបនឹងមានការខ្វះខាតមិនគ្រប់គ្រាន់តាម តម្រូវ ការប្រើប្រាស់ប្រចាំថ្ងៃទៀតឡើយ ដោយសារតែប្រភពទឹកសាបនៅបឹងព្រែកទប់ក្បែរសណ្ឋាគារឯករាជ្យបានរឹង ស្ងួតអស់ទៅហើយ។ ដូច្នេះអង្គភាពមិនមានលទ្ធភាពបូមទឹកសំរាប់ចែកចាយនៅក្រុងព្រះសីហនុ បានទៀតទេ។
ស្ថានភាព បែបនេះនឹងអូសបន្លាយរយៈពេលយូរតទៅមុខទៀត ដូច្នេះប្រជាពលរដ្ឋនិងអតិថិជនត្រូវមានការយោគយល់និងត្រូវចេះ សន្សំសំចៃនិងរក្សាទឹកទុកប្រើប្រាស់។ មន្ត្រីដដែលបានឲ្យដឹងទៀតថា ការផ្គត់ផ្គង់ទឹកអាចដំណើរការជាធម្មតាវិញបានលុះត្រាតែបឹងព្រែកទប់ មានប្រភពទឹកឡើងវិញ នៅពេលមានភ្លៀងកក់ខែ ឬក៏នៅរដូវវស្សាចូលមកដល់។ ទោះស្ថិតក្នុងស្ថានភាពបែបនេះក៏ដោយអង្គភាពរដ្ឋាករទឹកខេត្ត ព្រះសីហនុនៅមានស្ថានីយ៍បូមទឹកមួយកន្លែងទៀត នៅក្បាលឆាយសម្រាប់បូមទឹកផ្គត់ផ្គង់ប្រើប្រាស់ក្នុងក្រុងព្រះសីហនុ ប៉ុន្តែការបូមទឹកនៅតែមានបញ្ហារអាក់រអួលដដែល គឺនៅត្រង់ថាកង្វះថាមពលអគ្គិសនីគឺជាមូលហេតុចម្បងសម្រាប់ដាក់ឲ្យ ដំណើរការស្ថានីយ៍បូមទឹក។
ក្នុងស្ថានភាពយ៉ាប់យ៉ឺនបែបនេះអង្គភាពរដ្ឋាករទឹកមិនអាចធ្វើការ ផ្គត់ផ្គង់ទឹកបាន២៤ម៉ោង នោះទេ តែនឹងមានការផ្លាស់ប្តូរវេនគ្នាដោយបិទតំបន់មួយបើកតំបន់មួយ ដើម្បីជួយបែងចែកទឹកឲ្យបានប្រើប្រាស់គ្រប់ៗគ្នា។ សូមបញ្ជាក់ផងដែរថាដីនៅជុំវិញបឹងព្រែកទប់ពេលនេះត្រូវបានគេ នាំគ្នារំលោភយកនិងទន្ទ្រានកាន់កាប់បែបស៊ីសង្វាក់ ដោយដឹកដីចាក់លប់លើចំណីព្រែកប្រយោជន៍វាតយកដីធ្វើជា ទ្រព្យសម្បត្តិផ្ទាល់ខ្លួន។ បញ្ហាខាងលើនេះបានធ្វើឲ្យផ្ទៃបឹងទាំងមូលគោក រាក់និងមានទំហំតូចទៅៗជាហេតុធ្វើឲ្យផ្ទៃបឹងទាំងមូលផ្ទុក ទឹកបានតិច មិនមានបរិមាណទឹកគ្រប់គ្រាន់សំរាប់ផ្គត់ផ្គង់ជូនប្រជាពលរដ្ឋនិង អតិថិជនបាននោះ ទេ៕
